Listen Now: 
November 07, 2014
Waikato ka rongo i te wiriwiri o te whenua.
Waatea Team
Posted On November 7, 2014
Waikato ka rongo i te wiriwiri o te whenua.
Kua ruu te whenua i tenei ata ki roto o Waikato ko te ruu tuarua i reira i tenei wiki.
3.8 te kaha o te wiriwiri i konaa kua whakaoho i nga kainoho o Matamata.
Paapaku te ruu nei 7 kiromita noa iho te hoohonutanga.
E mea ana te kaunihera o tera rohe he whakamaaharahara taua ngaaueue whenua kia aata whakariterite i a ratou mo tetahi ahuatanga pera.
Tuuru motuhake Maori
Korerotia o koutou aawangawanga mo te whakatuuranga o tetahi tuuru Maori ki runga i te Kaunihera o Ngaamotu.
Koia te whakatenatena a te roopu kaumaatua o Te Aati Awa aa ka tuu tetahi hui i te marae o Owae ki Waitara a te Raatapu kia korerohia te kaupapa.
E mea ana te tiamana tuarua o te kaunihera kaumaatau a Airihi Waru ko te hiahia kia whakamohio i te katoa ki nga pewheatanga o te kaupapa aapiti atu kia whakawhitiwhiti tirohanga.
I te marama o Hepetema i pooti te Kauniera a rohe o Ngaamotu ki te whakauu i tetahi tuuru Maori akuanei.
He kaupapa tuuruhi?
Kaahore nga toa Maori e whakaatu i tetahi aahua kino ki nga manuhiri tuuaarangi araa ki nga tuuruhi.
Koia te karanga a Pania Tyson Nathan toihau o te roopu take tuuruhi Maori o Aotearoa.
Hai taa Nathan ko tana kupu ki te hunga amuamu he ahurea motuhake to te Maoritanga…e kore e taea te kii he moorikarika tetahi porohanga.
Ki a ia ano i te mutunga ake ka kite nga tuuruhi i nga ahuatanga Maori kaatahi te tokomaha ka whakatata mai nei.
Oohanga pai te hanga.
He mea nui te oohanga Maori mo te oranga o Waikato whaanui.
Kei te piki haere te kaha o te oohanga Maori i taua rohe me te kii a nga kaiwetewete Paakeha
ka rongo nga pakihi katoa i nga hua, i nga painga o taua piki.
Kaati e mea ana te kaunihera mehemea ka tautoko i te tupu o nga pakihi e kore kaahore ka taka mai nga mea papai ki te katoa.
Nga Tohu Reo Maori.
Ko te wawata kia tatuu ano te reo ki te taumata tika moona.
Koia te korero a te Taura Whiri i te Reo Maori i te tirohanga atu ki te tukuna o Nga Tohu Reo Maori 2014 a te po nei ki Rotorua.
Hei taa Erima Henare e tika ana ma nga whaanau me nga haapori nga mahi mo te reo e aarahi.
Komiti Maori
E toru nga pire Tiriti o Waitangi kei mua i te Komiti Whiriwhiri Maori o Paaremata i tenei waa ma ratou nga whakataunga ture a Muriwhenua me te Kawerau aa Maki e whakatewhawha.
Ka titiro hoki te Komiti Maori ki tetahi pire a te Komiti Whakarite Mahere o te Matau a Maui e hanga ture ai kia whai waahi nga hapuu me nga iwi o reira ki nga whakatau a te Kaunihera a Rohe.
Ko Tuutehounuku Korako raaua ko te Pita Paraone etahi kanohi hou i te Komiti Whiriwhiri Maori.
Copyright © 2014, UMA Broadcasting Ltd: www.waateanews.com
RELATED NEWS
