Listen Now: 
Rotorua, te painga o te wai.
E whakatenatenahia ana nga hapuu me nga iwi e karapoti ana i te moana o Rotorua
ki te haere ki nga hui hai matapaki i nga painga o te wai i to ratou roto me te tukuna o te matuu nitrogen ki te wai.
E mohio ana ki te kino o nga paanga ki te wai te tikanga kia korero i nga momo mahi hai aarai i taua kino.
Hai taa kaikaunihera Arapeta Taahana ehara i te mahi maamaa kia whakatika i te ahua o te wai heoi ano ka tiimata te tuatahi o nga hui korero apopo ki Rotorua.
Tikanga whakahaere puutea
Ka aronui nga tari karauna ki nga tikanga whakapau puutea kaahore ranei ki nga hua o te mahi.
Hei taa Taariana Tuuria Minita Whaanau Ora o mua e koa ana ia ki te whakawhitinga o te tauira ratonga paapori atu i nga ringaringa o te Puni Kookiri ki nga komihana motuhake e toru.
E mea ana aua koomihana he iti te puutea e waatea ana ki te whakahaere i nga mahi tautoko heoi ano e kii ana a Tuuria ki a ratou me ngaakau maahaki, taaria te waa ki te putanga mai o te tahua puutea a te kaawanatanga a tera tau.
Awhinatina rawakore ka tika.
Me titiro te kaawanatanga ki ana whakahaere mo te tohatoha puutea ki nga whaanau.
Koia te korero a etahi kairangahau take paapori i tenei waa na te whiunga o te puutea ki nga whaanau tamariki nohinohi ka mahue ko nga whaanau me nga tamariki pakeke ake.
Te mea kee he nui ake te utu ki te whaangai i nga taitamariki i nga tamariki pakupaku.
Ahatia te rere o te puutea ki te hunga rawakore me o ratou whaanau te ahua nei kei te whakaatu te Piriimia i tana hiahia ki te aawhina i te mamae o te rawakoretanga.
Kia haangai te titiro.
I runga i te tika me te pono ka hoki a Aotearoa ki a Reipa.
Koia te tumanako o Nanaia Mahuta kaiwhakataetae mo te rangatiratanga o taua roopu.
Hai taa Mahuta kei te kite nga kaipooti i te ahua tauwehe o Reipa i tenei waa me whakarerekee i taua ahua koia tetahi mea nui.
Ki a ia ano ko nga kaupapa here e whakarite tuuranga mahi, e whakarite whare, e whakawaatea i te huarahi ako o te maatauranga ma era ahuatanga ka riro ano ma Reipa te mana kaawanatanga.
Tuuru Maori, whakakorengia.
E tika ana me whakakore i nga tuuru toorangapuu Maori e whitu te korero a David Rankin o Te Taitokerau.
Ko tana hiahia kia whakarite petihana hai tohanga atu ki te motu whaanui ki te kimi tautoko mo tana hiahia.
E mea ana a Rankin he tikanga nga tuuru Maori e whakaiti ana i a tatou i konaa ka pooheeheetia kaahore ano te Maori kia whiwhi tuuranga i roto o Aotearoa.
Apiti atu, ki a ia ano he iti ake i te kotahi haurua o nga kaipooti Maori e noho ana i runga i te raarangi pooti Maori aa he ngoikore to tatou paanga ki nga tuuru Maori i te waa o te koowhiringa pooti.
He Whare Rangahau…ka whakatuuria.
Kua tiipakohia nga taangata mohio ki te whiriwhiri i tetahi Whare Kairangi mo te Rangahau e titiro ai ki nga rangahau Maori.
5 miriona taara ia tau, ia tau mo nga tau e rima atu i te tau 2016 ka tohainga ki te kaupapa.
Ko Taa Mason Durie te tiamana o te komiti whiriwhiri ma taua komiti nga mema o te Whare Kairangi e whakariterite.
Hai taa Durie kua tiimata te tukanga ki te tiipako i nga kairangahau aa ka whakapaaho i nga mema o te whare raka a tera tau.
Copyright © 2014, UMA Broadcasting Ltd: www.waateanews.com
RELATED NEWS
