Listen Now: 
Ka haina te iwi apopo.
Kua whakaaetia te whakataunga Tiriti o Waitangi a Ngaaruahine o Taranaki.
Te tikanga kia waitohu te iwi i taa ratou whakataunga ookawa apopo.
Hai taa Daisy Noble maangai matua o Ngaaruahine e paa ana ki te kaupapa nei 90 paiheeneti o nga uri i pooti e tautoko ana i nga whakaritenga ka taangia ki te ipurangi nga otinga o taua pooti akuanei.
Hua hauhaa
Kei te whakaheengia e nga iwi te hootaka tauhokohoko i nga hua hauhaa.
Kua tukituki te Kaawanatanga i taa ratou kupu taurangi araa e kore te waariu o nga hua hauhaa araa carbon credits e heke.
Koia te whakapae a Apirana Mahuika te tiamana o te kaahui rangatira Maori mo te huringa o te aahuarangi.
Kua heke ki te toru taara te utu maakete mo nga hua hauhaa, na runga i te urunga mai o nga hua i te raawhiti o Uropi ki te waipuke i te maakete o Aotearoa.
He whiu koohatu te mahi.
Kei te hee te whakapae a Winston Peters he roopu noho wehe te roopu Mana.
Koia taa Hone Harawira rangatira o Mana whai muri i te kupu korero a Peters e kore ia e tautoko i tetahi roopu a iwi e hiikoitia ana i te ara toorangapuu pera i a Mana.
Hai taa Harawira ano e whakahaerehia ana tana roopu e te Maori me ona kaupapa engari he iwi rawakore, he iwi i raupatungia.
Ahatia ki taana titiro tokomaha nga taangata e taetae atu ki aa ratou hui me te mea nei ka rongohia taa ratou karere toorangapuu.
Kaare he painga o te whakahaawea.
He takaruretanga mahi mahue ake.
E kii ana te roopu Kaakaariki kii tonu te whare kei reira te hunga e whakaiti ana i te Maori engari me mohio aua roopu toorangapuu e kore ratou e whai hua ki te uu ratou ki te tikanga whakahaawea iwi.
Kua tuu etahi roopu ki te karanga i aa ratou whakahee ki nga tuuru Maori, ki nga hua e taka mai ai ahakoa iti, ahakoa rahi.
Hai taa Meetiiria Tuurei rangatira takirua o nga Kaakaariki he tokoiti te hunga e korero pera ana he wairua rerekee pea te ahua.
He whakataetae motuhake.
E tika ana me pooti tatou koia te karere matua a Tiki Taane kaiwaiata Maori ki o tatou rangatahi.
Ka tuu tetahi whakataetae ki te akiaki i nga taiohi kia kii taurangatia o ratou hoa ki te pooti waihoki o te roopu me te maha ake o nga oati ka toa aa ka hau atu a Tiki Taane ki to ratou whare ki te waiata.
Hai taana ma te pooti ka whai waahi te tangata ki te whakairo i te ahua o tenei whenua.
Kia iti ake te waipiro ki te toto.
Kua whakaaetia te paanuitanga whakamutunga o te pire paaremata kia whakahekea te taumata waipiro ki te toto atu 80 ki te 50 mirokaramu i te 100 mirorita o te toto.
E mea ana te kaawanatanga he kaupapa whakaora taangata tera, ka whakaheke hoki i te maha o nga whara.
Ki a ratou ano kua puta ano te karere ki te iwi whaanui e kore e whakaririka i te haurangi o te whakaaro, ina hautuu waka te tangata.
Ka haina te iwi apopo.
Kua whakaaetia te whakataunga Tiriti o Waitangi a Ngaaruahine o Taranaki.
Te tikanga kia waitohu te iwi i taa ratou whakataunga ookawa apopo.
Hai taa Daisy Noble maangai matua o Ngaaruahine e paa ana ki te kaupapa nei 90 paiheeneti o nga uri i pooti e tautoko ana i nga whakaritenga ka taangia ki te ipurangi nga otinga o taua pooti akuanei.
Copyright © 2014, UMA Broadcasting Ltd
RELATED NEWS
