Listen Now: 
Pepi pod
Ma nga hootaka whakaruruhau peepee pera i te hotaka e kiia nei ko Peepi-Pod ka heke haere, ka heke haere te maha o nga mate moenga.
Ki nga tatauranga mate peepee mo te tau 2013 kua tukua e te tari tatauranga i tera wiki he ahua rite te taumata o nga mate ki nga rohe hauora e whaa o te motu.
Kaare he rohe tua atu i a Waikato mo te whakarato Peepi-Pod.
He haerenga whakatupu puukenga toi.
Ka tuu tetahi hootaka hou kai whakatupu nga kaikanikani Maori me nga kaituhi Maori i o ratou puukenga ki taawaahi ki te whenua o Kaanata.
Ka whakataha tuuranga mo etahi puukenga Maori ki reira aa ka whai waahi nga kaitoi e whiriwhirihia ai ki te mahi tahi me nga puukenga o taawaahi.
Ko Toi Aotearoa te kaiwhakarite i nga karahipi mo nga taangata e rua aa ka kati i nga tono katoa hai te 10 o Haratua.
Tariana paipa, whakamoemiti.
Ki te hunga huri tuaraa ki te tuupeka te whakawhetai, te whakamoemiti.
Koia te kupu whakamihi a Taariana Tuuria ki a tatou katoa e para ana i tera o nga huarahi uaua.
E huri ana te aro ki nga taangata e whakamaatautauhia ana te tikanga whakawhiti paitini o nicotine replacement.
Neke atu i te rua rau taangata kei te whakaharatau i taua tikanga hou kia mutu ai te kai paipa hai taa Tuuria ano ahakoa he huarahi uaua tera he huarahi rangatira whai hua i tenei ao.
Taru kino, aukatingia
Tata ki te whitu mano nga tupu taru kaakaariki kua hopukia e te kupenga rapu tarutaru a nga Piriihimana i te Taitokerau.
Ko te rohe o Kaitaia tetahi i tirohia e te tari to ratou waka topatopa me to ratou waka rererangi.
Tekau maa tahi taangata i hopukia he nui ake nga tupu tarutaru i kitea i tera tau engari e kore e rite nga otinga rapu tarutaru i tera tau ki nga kitenga o te waa i tenei tau na te mea he moata tonu.
Whakaorangia te piingao
Ka whakawhitiwhiti moohiohio nga kaipuutaiao me nga kairaranga piingao kia whakaora te tupu motuhake tera o te taha moana.
75 mano taara kua riro ki te whakahaere i tetahi hootaka rangahau aa ka mahi ngaatahi te tokomaha ki te kohikohi mohiotanga e paa ana ki te piingao.
Te tumanako kia whiriwhiri whakatau mo te oranga me te whakahaeretanga o te piingao i tana taiao ahakoa ki hea.
He koopaka o te neehi
E tupu haere ana te karanga mo nga neehi Maori no konaa ka tuu ake nga ratonga maatauranga pera i te Kuratini o Manukau i Taamaki ki te tuutaki i te wero.
Hai taa Denise Kivell kaiwhakahaere take neehi o Manukau he mea nui kia kite nga iwi katoa i nga tuuranga o te hauora Maori mai Paakeha mai Haamoa mai a wai atu, a wai atu.
Kaati kua huri te Kuratini o Manukau ki te aronui ki te hiikoi a nga tauira Maori i nga kaupapa hauora pera i nga mahi neehi.
Copyright © 2014, UMA Broadcasting Ltd
RELATED NEWS
