January 30, 2014
He korero mo te haki.
He korero mo te haki.
He whakaaro pai, he whakaaro kino ranei te korero kia arotakengia te pai, te tika o te haki o Aotearoa.
Kua whakaorangia tera kaupapa e te Piriimia e John Key ko tana hiahia kia aata matapaki tetahi haki hou me ana minita tautoohito.
Ko tetahi mea nui hai taa Key kia whakamaamaa te tukanga korero i te taupatupatu mo te haki o tenei whenua koia te tumanako.
Jones maatauranga
Ko te rautaki maatauranga hou a Naahinara ehara i te rongoaa ki nga raruraru ako o te waa.
Koia te korero a Shane Jones o te roopu Reipa me tana kii e kore kaahore ka tuu era ahuatanga a te Kaawanatanga hai whakawehewehe i nga kura me nga kaimahi.
Ko te paatai hai taa Jones mehemea ka mimiti nga rawa tautoko ki etahi kura ma nga tamariki e utu, e rongo ranei i nga paanga?
Waka Toi
Ka whakakore i te roopu e kiia nei ko Te Waka Toi kia whakarite he anga hou mo nga kaupapa toi o te motu.
Tokowhaa nga Maori e mohio ana ki nga kaupapa toi Maori me a tatou tikanga ka tukua ki tetahi poari hou ko ratou etahi o te 13 mema ka noho i te Kaunihera Toi o Aotearoa.
Hai taa Chris Finlayson Minita Kaupapa Toi he matatini rawa te anga o mua mo nga take toi ko te mea nui kia huri te katoa o te aro ki nga kaitoi me a ratou mahi.
Hiikoi whakahee
E whakatika ana tetahi roopu ki te hiikoi mai Te Reinga ki Waitangi ko taa ratou he whakahee i te koowiriwiri ki te tuuhura hinu.
E ki ana a maangai korero a Reuben Taipari kaahore he mana o te Kaawanatanga ki te tuku raihana ki nga kamupene o taawaahi na reira e tautokohia ana te hiikoi e te haapori whaanui o te raki.
E kii ana a Meetiiria Tuuria rangatira takirua o nga Kaakaariki ka tika te hiahia ki te whakahee i nga mahi kerikeri ahakoa ki hea, ahakoa ko wai e keri.
Ngai Tahu
Haramai te ahua o nga mahi whakaako i nga kaimahi ringa raupaa.
Ko taa te Kaawanatanga he whakawhaanui i taa ratou hootaka mo te tupu o nga mahi a rehe.
He Toki ki te Rika tetahi hootaka Maori ka whai waahi ki nga mahi whakawhaanui me tetahi porohanga o te puutea hai taa Mark Solomon kaiwhakahaere o Ngai Tahu ma enei momo whakaritenga ka aawhina i te whakahoutanga o Otautahi a nga tau e tuu mai nei.
Mahi moorearea
Taa te mea ka whakarewa nga kaiwhakahaere ngahere paina i to ratou ake tirohanga ki nga
tikanga haumaru i taua mahi kaua te Kaawanatanga e maatakitaki noa.
Koia te whakahau a Te Ururoa Flavell o te Paati Maori me tana kii tino kore ia e whakaae ana ki te korero a te Kaawanatanga e whakapau ana to ratou kaha ki te whakaheke i te maha o nga mate ngahere ki nga kitenga o te waa, tokomaha rawa atu nga kaimahi kei te matemate i a ratou e mahi ana.
Copyright © 2014, UMA Broadcasting Ltd