Listen Now: 
January 12, 2014
Ka nui nga tikanga whakaruruhau i te taiao?
Waatea Team
Posted On January 12, 2014
Ka nui nga tikanga whakaruruhau i te taiao?
Mehemea ki te aata tiakina te taiao kia kaikaa a Aotearoa ki te tautoko i te hiahia o nga kamupene nunui ki te keri i te hinu.
Koia te tirohanga a te nuipepa o te heerora me taa ratou paatai ki te ahua haumaru o nga tikanga whakaruruhau i a Tangaroa.
I te mutunga o te raa e mea ana te Kaawanatanga na te whati tata iti o te turuturu hinu e tika ana kia iti hoki kia maamaa nga tikanga whakahaere i te tuuhura me te keri matuu, keri hinu.
Kei te kii hoki te heerora kaua e waiho ki nga ringa o te Kaawanatanga te katoa o te mana whakahaere mo tenei kaupapa whakahirahira mo te rapu i nga matuu ki te moana.
Ruataniwha nga uauatanga.
Akuanei ka hoki ano te poari e arotake ana i te hootaka paapuni o Ruataniwha ki te matapaki i te kaupapa.
Kaore ano nga taha e rua kia aata whiriwhiri tera take nui te utu ko te tikanga i tenei waa kia whakaarohia he mahere ma te pai anake ka taea ma nga taha katoa te whai.
Rite pai ana taua mahere ka waatea te haapori whaanui ki te tuku i a ratou tono hai a mua i te marama o Aperira.
Tonga, kua rongohia nga paanga nunui.
Kotahi te tangata neke atu ranei kua mate i te huripari nui i Tonga i nga raa whakataa.
Ko Ha'apai te moutere i kino ake te paanga o te aawha i reira aa inapoo raa kua tere waha atu i nga rawa aawhina ki te iwi.
Horekau he waea whakawhitinga korero ki taua motu i tenei waa na runga i te whakapae 70 paiheneti o te rohe kua patua kinotia e te huripari taumata tuarima.
Pahikara moorearea, ki te kore he pootae tika.
10 mano nga taangata eke pahikara e haamene ai ia tau ia tau na te korenga o te potae maaroo.
E mea ana nga Piriihimana no te tau 2000, kua piki haere te maha o te hunga eke pahikara i runga i nga huarahi.
Ki nga korero a te Tari Hautuu Waka 0 paiheeneti ka mau potae maaroo heoi ano hai taa nga Piriihimana ano horekau he waahanga o te tinana nui ake, whakahirahira ake ranei i te maatenga o te tangata.
Nga wero toorangapuu o te waa.
He tau whakahirahira tenei mo Te Ururoa Flavell o te Paati Maori i tenei tau.
Ko ia te rangatira takirua o te Roopu Torangapu Maori inaianei he mea nui kia pupuri ki tana rohe pooti ki te Waiariki ma reira ka hoatu nga mema e rua e toru ranei mo Naahinara i te Koowhiringa Pooti.
Hai taa Matt McCarten kaiwetewete toorangapuu ahakoa he aha te otinga i te Waiariki e kore e mau i te Paati Maori nga tuuru o Taamaki Makaurau me te Taihauaauru.
He pona Len Brown ka wetea?
Te ahua nei e tatari ana a Len Brown te koromatua o Taamaki Makaurau kia tau te puehu whai muri te kitenga o ana mahi puuremu i tera tau.
He nui nga koohimuhimu kua rere i roto i nga marama nei aa kua paakinotia ko Brown me tana whaanau e nga korero.
Heoi ano e mea ana tana tari ko taa Brown i tenei waa he whakataa me te hiahia tonu kia whakatinana te wawata ki te hanga i tetahi ara tereina tata ki te 3 piriona taara te utu.
Copyright © 2014, UMA Broadcasting Ltd
RELATED NEWS
