December 09, 2013
Kirihimete kia tuupato
Kirihimete kia tuupato
Kia mataara tatou ki nga taimahatanga i te waa o te Kirihimete e haramai nei.
Hai taa Anton Blank o Te Mana Ririki ko te puurongo a te Koomihana Tamariki kei te whakamahara mai kua tata te kotahi hautoru o nga tamariki Maori e noho ana i nga kaainga poohara.
Hai taana ano i te Kirihimete ka huu ake nga raruraru na runga i te maha o nga taimahatanga a puutea aha atu te take, ki nga whaanau.
Mana whenua kaua e takahia.
Kua takahia e te Karauna te mana whenua o Ngati Porou e paa ana ki te hiahia ki te keri i te whenua, ki te keri hoki i te moana i te Tairaawhiti.
Hai taa Apirana Mahuika tiamana o Ngati Porou kaore ano nga kaipupuri whenua kia rongohia, kaore ano nga kaipupuri hea kia rongohia.
Hai taa Mahuika ano ko te hiahia kia aronuitia nga motika o Ngati Porou hai kaitiako o o ratou whenua me nga rawa katoa aa ka aatete te iwi i nga mahere katoa e whakatuma ana i te mana, i te rangatiratanga o te iwi.
Te iinoi a Ngati Hau
Kua tuhi reta a Ngati Hau o te Taitokerau ki te Piriimia ki a John Key ki te wero i te hiahia ki te keri koura i to ratou rohe.
I aukatingia te huarahi matua i tera marama e Ngati Hau ki te whakaatu i taa ratou whakahee.
E hiahia ana ratou kia hau atu a John Key raaua ko Stephen Joyce ki te whakarongo ki nga mahere a te iwi kaainga mo te whakatupu oohanga, mo te whakatika hoki i nga awa me nga wai nohinohi.
Nga whakahaere hou ki etahi kura Maori.
He pai te urunga atu o te haahi Mihingare ki te whakahaere i nga kura o Te Aute me Hukarere.
Koia te korero a Robin Hapi te tiamana o te roopu whakahaere o Te Aute i tana hekenga i taua tuuru.
Ka tuu ake nga kaitiaki o te poari o te Kaareti o Hato Hoani ki te arataki i nga kura mo nga tau e toru.
Hai taa Hapi ano he roa te waa o te hononga i waenga i aua kura te Karauna, te haahi Mihingare me te iwi kaainga aa ka anga whakamua taua hononga ki taumata ano.
He rautaki whakakaha hononga
E whakarite ana te Whare Waananga o Lincoln ki te whakapakari i ana hononga ki te Maori.
Kua haina kirimana ratou ki etahi iwi hai taa Hirini Matunga kaihautuu tuarua o Lincoln kua roa te piringa o tana kura ki a Ngai Tahu aa kei te titiro me pehea e aawhina i nga iwi kua whakatauhia a ratou kaupapa Tiriti o Waitangi.
Hai taana ano na huringa o nga iwi ki te taamata i o ratou ake whenua ka piirangi ratou ki te whakatupu i te mohiotanga o nga rangatahi ki nga mahinga ahuwhenua.
He take hauora
Na te korenga o te Waipounamu ki te whakakotahi i nga ratonga hauora Maori i reira kei te whai Te Hauora o Ngaati Raarua o Waiharakeke i to ratou ake huarahi.
E taarewa tonu ana nga ratonga i te raki o tera motu na te hinganga o ratonga Maori o Te Rapuora i tera tau.
E piirangi ana te Poari a Rohe o Whakatuu kia mahi ngaatahi nga ratonga Maori katoa atu i te marama o Hurae a tera tau.
Heoi ano hai taa Rod Bird tiamana o Ngati Raarua he whaaiti te titiro a taua mahere aa e kore tana roopu e whakaheke i a ratou tikanga mahi.
Copyright © 2013, UMA Broadcasting Ltd