October 24, 2013
Kaore ano te Kaunihera kia moe.
Kaore ano te Kaunihera kia moe.
E riri ana etahi rangatira o te Kaunihera Maori i te korero a Taa Tiipene O'Regan kua too te raa ki taua Kaunihera.
E mea ana a Taa Tiipene waiho ma nga iwi hai whakapiri atu ki te Karauna .kaare he tuuranga pera mo te Kaunihera.
Heoi ano hai taa Maanu Paul tiamana takirua o te Kaunihera Maori ehara tana roopu i te pononga a te Karauna engari he tohu o te tino rangatiratanga.
E kore a muri e hokia.
E kore e rereke ake aku whakaaro, ahakoa kei te tau haere te puehu e pa ana ki a Brendon Horan me te whakapae, nana i tahae te putea a tana mama i te wa e manawakiore haere ana ia.
Koira taa te kaiarahi i te roopu Aotearoa Tuatahi, taa Winston Peters.
E ai ki nga purongo o te wa, kua mutu te whai a te kaiarahi i te ohaaki a te mama o Horan, i te kotahi rau mano taara i ngaro, engari, hei taa Peters, i panaia e ia a Horan i runga i tana whakapono, he tika te whakapae, nana taua putea i tahae
Hui auahi kore
Kei te hui nga roopu auahi kore Maori ki te whakarite rautaki hou e mutu ai taa te iwi Maori whakawhirinaki ki te tupeka.
Kei te whakahaere Te Ara Haa Ora me te Tomorrow Cancer Society i te hui nei, a, kua tae mai etahi manukura i tarawaahi ki te whakatakoto korero, me pehea ra taa tatou aukati i te rerenga mai o te tupeka ki tenei whenua, otira, ki nga toa hei hoko ma tatou.
Hei taa Zoe Hawke o Te Ara Haa Ora, kei ia kokonga o nga hapori Maori, he toa e kii ana i te mokihi tupeka hei hoko ma te Maori, me te aha, he raru nui tera
He tiaki kaimahi
E paarekareka ana ki te uepu kaimahi FIRST Union, te whakaaro kia uru nga iwi ki te rangai poro rakau ki te awhina i nga umanga poro rakau i roto i waa ratou kaupapa tiaki kaimahi.
Hei taa te mangai o FIRST Union, a Rawiri Daniels, e pukuriri ana ratou kaore te Kawanatanga i te whakaae ki te whakatuu arotake e pa ana ki te tokomaha o nga kaimahi ngahere ka mate i a ratou e mahi ana.
Hei taana, tera pea ma te tautoko a nga iwi, ka pai ake nga tikanga haumaru kaimahi a nga umanga
He taonga
Kua horahia mai e Tamaki Paenga Hira, ara, e te Whare Pupuri Taonga o Tamaki Makaurau, taa ratou rautaki mo te rua tekau tau e tu mai nei, a, ko tetahi o ana whainga nui, he whakamohou ake i te wahanga taonga Maori.
Hei taa te tumu whakahaere o Tamaki Paenga Hira, a takuta Roy Clare, ka whaanui ake te wahanga taonga Maori, a, ka whakaurua nga hangarau o te wa ki roto kia ngawari ake ai taa te tangata matakitaki whakaahua, whitiahua, tuhinga tawhito hoki.
Ka mahi tahi te whare pupuri taonga, te whanau Taipari me Ngati Maru ki te whakahou ake i te wharenui Hotunui.
Whakapuaretia nga kanohi.
Na te piripono ki nga kaupapa mahi moni i hinga ka ngaro haere nga tuuranga mahi i Aotearoa.
E rua nga waahi mahi kei reira te tini o nga kaimahi Maori kua katia i te wiki nei, tetahi i Rotorua, tetahi i Shannon.
Hai taa Winston Peters kaiaarahi o Aotearoa Tuatahi he whakahirahira aua waahi mahi no te mea ka whakatupu waariu ki nga hua o te whenua.
Te mea kee ki taa Peters titiro kei te maatakitaki noa iho te Kaawanatanga.
Copyright © 2013, UMA Broadcasting Ltd