October 02, 2013
He waa kino mo te arotake.
He waa kino mo te arotake.
Kei huri tuaraa te Piriimia ki nga motika tangata o te motu na runga i te waa kua whakaritea mo te arotake i te hokona o nga rawa a Aotearoa.
Koia te whakapae a Metiiria Tuurei rangatira takirua o nga Kaakaariki hai taana ano kei te kookiri i te hokona o nga rawa ahakoa e taarewa tonu ana te paanga o nga mahi hokohoko ki nga motika TOW.
Kaati kaahore nga Kaakaariki e pai ana ki te whakatau kia whakahaere te arotake i te waa tonu e hokohoko atu ai te kamupene hiko o Meridian.
Hunga whakaruru
He nui te tautoko o Aotearoa kia uru mai he kotahi rau rima tekau taangata whakaruru araa refugees mai Ahitereiria otiraa kia noho i Aotearoa.
Ka hui tahi a John Key me te Piriimia hou o Ahitereiria a Tony Abbott ma raaua te kaupapa mo te hunga whakaruru e korero i te raa nei.
Hai taa te roopu Kaakaariki he tohu pai te kitenga o to tatou tautoko mo era taangata, kaua rawa tatou e whai te huarahi aroha kore o Ahitereiria mo taua kaupapa.
He moni aawhina
Ka tuku atu ki nga taangata e hoko ana i o ratou whare tuatahi ki waho o nga taone nunui he moni aawhina ki te hoko i nga whare a te tari whare i whakareerea.
20 mano taara te rahi o te moni aawhina kia kuhu atu nga kaihoko iti a ratou puutea ki tetahi whare.
Te tikanga kia iti ake i te 80 mano taara ia tau te whiwhinga puutea ma tetahi takirua.
Heoi ano hai taa etahi kaiwetewete toorangapuu kua whakatuuria tenei kaupapa e te Kaawanatanga ki te whakatiitaha i nga whakaaro o te motu atu i taa ratou tikanga hou ma te hunga e hoko ana i o ratou whare tuatahi ki tenei kaupapa mirimiri i etahi o nga taangata iti te puutea.
He waahi pai mo nga kaumaatua
Ko Aotearoa he noohanga pai mo te hunga kaumaatua kuikuia.
Ki nga rangahau o te waa ko Aotearoa te whenua tuawhitu o te ao mo te taha ki te tiaki I o tatou pakeke.
Ko Ahitereiria te 14 o nga whenua.
Kaati e mea ana te roopu kaumaatua o Grey Power na to tatou tokoiti he maamaa ake ki te
ropiropi i o tatou kaumaatua heoi ano, e tere tupu ana te tini o ratou ia tau, ia tau.
Kaiako kore mahi
E hia kee kaiako kei te noho kore mahi aa, ka tini rawa e tono atu ana mo tetahi tuuranga kotahi.
Heoi ano e mea ana te Kaawanatanga kua pai tera tuuahua i te mea e tupu haere ana to tatou
tokomaha ma reira ka tupu te hiahia ki nga kura maahita.
Kaati he nui tonu te hiahia mo nga kaiako reo Maori ki nga kura tuarua.
Paipa ki ro waka
Ka tuuwhera tonu nga tamariki ki te auahi o te paipa ki roto i nga motukaa.
Ki etahi kairangahau horekau he rerekeetanga ki o ratou tatauranga i kitea i roto i nga tau kua ngaro nei ka paakinotia tonutia nga tamariki o etahi haapori ki te paitini o te paipa ki ro waka he tohu tera kei waahi kee nga whakaaro o nga pakeke.
Na reira kei te karanga mai e tika ana kia whai a Aotearoa i te tauira o taawaahi araa, kia aukati te kaipaipa i nga motukaa mehemea he tamariki kei roto.
Copyright © 2013, UMA Broadcasting Ltd