Listen Now: 
Maori e takahi ana i te ture
Kua whakatere te Manatu Pirihimana o Aotearoa i tetahi whainga hou e heke iho ai te nui o nga Maori e takahi ana i te ture, ma te rua tekau ma rima oorau hei mua i te tau rua mano rua tekau ma tahi. Hei taa te toihau o Te Ratonga Maori o nga manatu Pirihimana o te Tai Ra Whiti me te Waiariki, a Phillip Taikato, ka uaua pea te whakatutuki i taua whainga, engari, ma te tautoko a nga hapori me nga iwi, ka taea.
Nga mahi tinihanga a Turei
E karanga ana te kaiarahi i Nga Kakariki a Metiria Turei, kia whakatuuria he whakaritenga hamene kore kia taea ai e te hunga kua tinihanga i te Tari Whakahiato Ora i nga wa o mua, o ratou hara te whaaki me nga take i tinihanga ai ratou i te punaha penihana o tenei whenua. I whaaki a Turei i ana mahi tinihanga i te tari whakahiato ora me te punaha penihana i nga ra tata nei kia kite marika ai tatou i nga uauatanga i paa ki a ia i nga wa o mua, otira, i nga uauatanga e paa tonu nei ki te hunga pohara i enei ra.
He aitua ki Te Tai Tokerau
Kua puta nga ingoa o te tokorua i puhia kia mate i te Tai Tokerau inanahi, ara, ko Wendy Campbell raua ko tana tamaahine a Natania. E ai ki nga korero, he kaitiaki whare raua, a, i te haere raua ki te tirotiro i tetahi whare i te huarahi o Mt Tiger, katahi ka puhia e te kainoho kia mate. I karapoti nga pirihimana i te whare, mea rawa ake, ka mumura ake he ahi, ka pau te whare, pungarehu noa. E whakapae ana ratou, i mate te kaipupuhi i roto i taua ahi.
Tokoiti nga Maori me o ratou ake whare
E ai ki nga tatauranga o te wa, e tokoiti haere ana te hunga Maori no ratou o ratou ake whare. E ai ki a Tatauranga Aotearoa, i roto i nga tau tata nei, rua tekau ma rima oorau te hekenga o te tatauranga mo nga Maori no ratou ano o ratou whare, ko te nuinga o nga Maori ehara i a ratou o ratou whare, kei te Tai Tokerau e noho ana. E ngana ana te Tarahiti o He Korowai Aroha ki te whakatuu whare utu mama hei hoko ma nga whanau o Kaitaia, a, hei taa te upoko o He Korowai Aroha a Ricky Houghton, me whakakore te Kawanatanga i te taake hokohoko ara te GST i runga i nga whare, kia taea ai e etahi whanau Maori te hoko whare mo ratou.
Matenga no te synthetic cannabis
Tokowaru nga taangata o Tamaki kua mate i te whakapoauau matuu horihori, ara, i te synthetic cannabis i tenei marama nei o Hongongoi. Hei taa Gilbert Taurua o te Tuapapa Kai Whakapoauau o Aotearoa, ko te mate ke, kaore e marama ana nga karere e rere nei, mo te kino me te moorearea o tera momo whakapoauau.
Tokomaha nga kaiako kei te wehe
E karanga ana te mangai torangapu mo Reipa e whakataetae nei ki te turu auraki o Te Raki Pae Whenua, a Shanan Halbert kia tere te whakatuu kaupapa e mutu ai te rerenga petapeta atu o nga kaiako i Tamaki ki nga rohe mahi ai. I haere a Halbert ki te Kaareti o Hato Petera, katahi ka nuku ki Te Wananga o Aotearoa ki te whai tohu. Hei taana, ko a tatou tamariki Maori te papa ki tenei tu-ahuatanga o te wehenga o nga kaiako i Tamaki, na te mea, he tokomaha nga kaiako Maori e wehe atu nei.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2017, UMA Broadcasting Ltd: www.waateanews.com
RELATED NEWS
