I puta i te Rōpū Rangatira ā-Iwi mō te Mātauranga tētahi kāri kaute, arā, tētahi ‘score card’, e whakatairite ana i ngā kaupapa here mātauranga a ngā rōpū tōrangapū e whitu, me te āhua o tā rātou tautoko i te mātauranga Māori.
Hei tā te Heamana, hei tā Rahui Papa, e whakaatu ana ngā hua, he kaupapa here tā te Pāti Kākāriki, Te Pāti Māori me Reipa e whai wāhi ana ki te mātauranga Māori, engari kāore a Nāhinara rātou ko ACT i whai kaupapa here e aro ana ki tēnei kaupapa. Hai tāna anō, me mōhio ngā whānau ki te tū a ngā rōpū tōrangapū mō te mātauranga o ā tātou mokopuna.
