Kua tau te kūpenga a Taramainuku ki runga i a Maungapōhatu, e whanga nei ki te hao i te ika nui o Ruatāhuna, Paku Kore o Ruatāhuna, Kākahu Mauku, arā, i a te tohunga, a Tā Pou Temara, tohunga ki te reo Māori me ngā tikanga, matapihi ki te ao kōhatu anō hoki.
He nui āna mahi ki te whakaora i te reo Māori, i ngā tikanga a ngā tīpuna, ā, tokomaha ngā ākonga i whai hua i āna akoranga. Hai tā tētahi o āna tauira i Te Panekiretanga o te Reo, hai tā Te Ururoa Flavell, ahakoa tana māro kia eke āna tauira ki te taumata ikeike, i tangata tūwhera ki te hora i ōna mōhiotanga ki te ao, e whai ake nei ko te whānuitanga o āna kōrero.
