I whakarewahia e ngā iwi e waru o Taranaki, arā, te Tōpuni Ngārahu, tētahi kaupapa hou, ko The Landline te ingoa. He kaupapa tēnei hei akiaki i ngā whānau o te takiwā kia rēhita, kia pōti hoki i te kōwhiringa pōti ā-motu o tēnei tau.
Hei tā te Pouwhakarae o te Tōpuni Ngārahu, a Wharehoka Wano, ahakoa kāore pea tēnei reanga e mōhio ki tēnei mea e kīia nei ko te ‘Landline’, ko te matū o te kaupapa, he whakawhātoro i te aka kūmara kia tae atu te karere akiaki i te pōti ki ngā whānau huhua o te takiwā.
