E rere nei ngā au o roimata ki runga i a Ngāti Raukawa i te matenga o Ahorangi Emeritus Whatarangi Winiata, 92 tau te pakeke.
Nāna i tū ai Te Wānanga o Raukawa, ā, ko ia hoki te kaikōkiri i te rautaki o Whakatupuranga Rua Mano, he mahere pae tawhiti i aro ki te whakapakari i te reo Māori, ngā marae, ngā hapū me ngā iwi o Ngāti Raukawa, Te Āti Awa me Ngāti Toa mō ngā whakatupuranga kei te heke mai.
E ai ki a Huhana Lyndon, kua puāwai kē ngā kākano i ruia e Whatarangi Winiata, ā, e kitea tonutia ana tōna mana me tōna tirohanga whānui i roto i ngā kaupapa maha e toitū tonu nei i ēnei rā.
