April 05, 2023
He mihi ki a Jacinda Ardern
I mōhio pai te Pirimia o mua, a Jacinda Ardern, ko ngā mahi e nui ana te hua mā ngā Māori, he mahi e nui ana te hua mā te katoa.
Koia nei te ki a Rahui Papa, māngai mō Waikato, i te rā e rere nei te whaikōrero whakamutunga a Ardern ki te whare Pāremata.
Hei tā Papa, “E kite atu ana i tana kaha ki te whiriwhiri i ngā huarahi a te Māori hei oranga mō te Māori, hei oranga anō mō Aotearoa. Koirā tētehi āhuatanga, ki tāku titiro, e pū ana i te ngākau o Jacinda. Nō reira, ka kite atu tātou i te hauora, ka kite atu tātou i te Toru Wai, ka kite atu tātou i nga kaupapa whakaitiiti i te kaikiri.
“Ka kite atu ai tātou i Te Ara Poutama, i te hekenga o ngā Māori i roto i ngā whare herehere, nō reira, he nui tonu ngā manako nui. Mehemea ka waiho mai ngētehi mana whakahaere kāwanatanga a te kāwanatanga ki te rangatiratanga o te Māori, ā tēnā, ka kite ake i te puāwaitanga o te ao Māori hei oranga mō Aotearoa.”