March 29, 2023
Tatauranga 2023: Kāore anō te kaupapa kia eke ki tana taumata
Kua tata ki te whā miriona tāngata kua whakakī i ā rātou pepa takitahi mō Tatauranga 2023, heoi kei te mōhio pai a Tatauranga Aotearoa kāore anō te kaupapa kia eke ki tana tihi.
Koia nei te kī a Atawhai Tibble, kaiwhakahaere Māori mō Tatauranga 2023. Hei tāna, 3,975,600 anō ngā pepa takitahi kua whahākīa, heoi i tēnei wā, neke atu i te kotahi miriona te hunga kāore anō kia whai wāhi atu ki te kaupapa. Hei tā Tibble anō, kei te akiaki tonu a Tatauranga Aotearoa ki taua hunga kia whai wāhi atu ki te kautetanga ā-motu mā te ipurangi, mā te noho kanohi-ki-te-kanohi me ngā kaiāwhina e noho nei i ngā hapori huri noa i te motu.
“Nā reira, mōhio tonu mātou o Tatauranga Aotearoa he huarahi, ehara i te mea he roa, engari me kī he maunga tonu me piki tātou kia eke tātou ki te tihi o te maunga, otirā ki tērā wāhi e wawatahia ana e ngāi tātou katoa.”
Whakarongo ki te uiui katoa ki konei.