June 14, 2018
Whakahoutanga o Te Whare Herehere o Waikeria
Whakahoutanga o Te Whare Herehere o Waikeria
Kua whakapuarehia e Te Minita i ngā take Whare Herehere, e Kelvin Davis ngā whakaritenga mō te whakahoutanga o te whare herehere ki Waikeria, a, hei tāna, kaore rātou i te whakatū whare herehere nui hou, arā Mega Prison ki reira inaianei, nā te mea, kaore ēra momo whare herehere i te angitū i tāwāhi ka tahi, ka rua, nā te mea, mena ka whakatū whare herehere pērā rātou, he tohu tera kaore rātou i te whakapono ka taea e rātou te pūnaha ture o tēnei whenua te whakatika. Hei tā Davis, ka whakatū wāhanga hou ki Waikeria, e rima rau moenga kei roto, ka whakatū hoki i tētahi wāhanga hou mō te hunga mate hinengaro, kotahi rau moenga kei roto.
Pukapuka Matihiko ki ngā Kura Tuakoka o Te Tai Tokerau
Kei te whai hua te kaupapa a Te Tarahiti Mātauranga o Te Taitokerau e uru ai ngā pukapuka matihiko ki roto i ngā kura tuakoka o te rohe. Kei te haere ēnei rauemi ki ngā kura kei raro i te kāhui e kiia nei ko Te Puawai, a, hei tā Liz Cassidy-Nelson o Te Tarahiti Mātauranga o Te Taitokerau, kei te whai hua ngā tamariki, ngā whānau me ngā kaiako i te taenga atu o ēnei hangarau ki waenganui i a rātou ki te whakawhanake i o rātou pūkenga.
Whakahouhia te whare o te Mīhana
Kua whai pūtea te Mīhana o Tāmaki Makaurau i te Kāwanatanga kia tū ai he wāhanga o to rātou whare mō te hunga e kiriwara waipiro ana, kiriwara tarutaru ana rānei. Nā te Minita i ngā take Hauora, na David Clark tēnei pūtea hou ki te Mīhana i pānui mai i te ahiahi inanahi. Mā tēnei pūtea ka whakahouhia te whare o te Mīhana, ka whai i ngā papa e rua ano kia tū ai tēnei wāhanga hou.
Ray Ahipene-Mercer Toihau o Orchestra Wellington
He kaiwaiata, he kaikaunihera, he kaitiaki taiao, inaianei, kua kopoua a Ray Ahipene-Mercer hei toihau o Orchestra Wellington. Koia te Māori tuatahi kia noho hei toihau o tētahi roopu tira i tēnei whenua. Ko ngā iwi o Ahipene-Mercer, ko Ngāi Tara me Ngāti Ira, a, hei tāna, e rikarika ana ia ki te kawe i ngā whakamīharotanga o te roopu tira nei ki waho i te Ūpoko o te Ika ki te motu whānui.
Āpure Taimoana ki ngā Moutere Rangitāhua
I waho i te whare pāremata ngā roopu taiao inanahi e whakamīreirei ana ki te Kāwanatanga kia tū tonu i a rātou he āpure taimoana ki ngā moutere o Rangitāhua. I ngana a Nick Smith o Nahinara ki te whakatū i tēnei āpure taimoana nei, i a ia e Minita Kāwanatanga ana, auare ake. E tōtara waahi rua ana ngā whakaaro o te Māori ki tēnei kaupapa, hei tā ētahi, ka tāmi taua āpure taimoana i o rātou tika, hei tā ētahi anō, e tika ana kia manaakihia te tini a Tangaroa kei pau. Hei tā te tāhūhū rangapū o Te Ohu Kaimoana a Dion Tuuta, ko te whakamīreireitanga i waho i te whare pāremata inanahi, he mahi nā ngā roopu taiao ki te whakararuraru i ngā kōrero i waenganui i te Māori me te Kāwanatanga mō tēnei kaupapa.
Kaha ake te Whakatairangatia o ngā Kino ki te Pepi
E hiahia ana te Komihana Tamariki kia kaha ake te whakatairangatia o ngā kino ka puta ki te pepi, mēnā rā ka inu waipiro te māmā i a ia e hapū ana. Hei tā kaiwhakawā Andrew Becroft, katahi anō ia ka hoki mai i Ahitereiria, otirā, i tētahi hui i āta wānangahia te hononga i waenganui i te inu waipiro a te māmā me ngā raru ka pā ki te pepi i roto i te kōpu, puta rawa mai ki waho. E ai ki ngā tatauranga i Ahitereiria, whā tekau ōrau o ngā taiohi kei roto i ngā whare herehere taiohi o Ahitereiria, e raru-a-hinengaro ana, nā te inu waipiro a o rātou māmā i te wā o te hapūtanga.
Hoko i ngā Puna Wai o Otakiri
Kua whakaaetia te hiahia o tētahi umanga no Haina ki te hoko i ngā puna wai o Otakiri i Whakatāne. Ko te ingoa o te umanga nei, ko Cresswell NZ Ltd, a, ko tō rātou hiahia kia whakatū whare umanga pātara wai ki te taha o ngā puna wai rā. Ko te hunga whakahaere i a Cresswell, ko Nongfu Spring Ltd, tētahi o ngā umanga pātara wai nui o Haina. Nā ngā Minita Kāwanatanga nei, na Eugenie Sage rāua ko David Clark te whakaaetanga nei i waitohu, e ai ki ngā kōrero, e ono tekau tūranga mahi ka hua ake i ngā mahi whakapātara wai nei.
Copyright © 2018, UMA Broadcasting Ltd: www.waateanews.com