Whakatipu rākau hou ki Minginui

Kei te whakapuaki kōrero te Minita Whakawhanake Rohe a Shane Jones mo te hāpori nohinohi o Minginui i te rā nei. Hei tā Jones, kua āta noho tahi rātou ko Ngāti Whare ki te whakamahere i tētahi kaupapa whakatipu rākau hou ki roto o Minginui. Ko te wawata ia, kia whakatipu māhuri ki roto o Minginui katahi ka haria ki te ngahere o Whirinaki, otirā, ki ngā ngahere o te motu. Hei tā Jones, he tino tauira tēnei o te āheinga o ngā hāpori Māori nohinohi, tuawhenua hoki ki te whakaora i a rātou anō i raro i tēnei Kāwanatanga.

Whakataunga tiriti o Ngāti Rangi

E ai ki te māngai mo te iwi o te maunga o Ruapehu, arā, mo Ngāti Rangi, me whakarerekē i te āhua o te whāngai pūtea ki Te Papa Atawhai. Katahi anō a Ngāti Rangi ka waitohu i tā rātou whakataunga tiriti, tekau mā whitu miriona taara te uara, engari, kaore rātou i whai whenua, nā te mea, kei raro iho te nuinga o o rātou whenua tūpuna i te mana o Te Papa Atawhai. Hei tā Che Wilson o Ngāti Rangi, kei te mahi tahi rātou ko Te Papa Atawhai, ko te Kaunihera-ā-rohe ki te whakahaere i te awa o Whangaehu.

Te mana o nga wāhine Māori

E rua tekau mā rima tau kua hipa i te kōkiritanga o te tono ki te Roopu Whakamana i te Tiriti, e kii ana, na ngā mahi kino a te Karauna i ngā tau ō mua i memeha ai te mana o ngā wāhine Māori. Ko te ingoa o te tono nei, ko Mana Wahine Claim, ā, nā ngā māreikura o te ao Māori i taua wā rā, na Kahurangi Mira Szazy, Kahurangi Whina Cooper, Kahurangi Rose Henare me Tākuta Irihapeti Ramsden i karawhiu . Ahakoa te roa o te wā kua hipa i te kōkiritanga o tēnei tono, katahi anō te Roopu Whakamana ka āta noho ki te wānanga i ōna āhuatanga.

Whakahē a Ngāti Whātua Ōrākei i Te Kaunihera o Tāmaki

Kei te whakahē a Ngāti Whātua Ōrākei i te rautaki a te Kaunihera o Tāmaki ki te whakawhānui ake me te whakaroa ake i ngā wahapū o Tāmaki kia tū ai ngā whare hou ki runga hei whakaruruhau mō ngā kapa o te whakataetae Ipu Amerika. Hei tā Ngarimu Blair, kua roa te mauri Te Waitemata e takahia ana, nā ngā mahi maioro papa moana, mahi hanganga hoki a te Pākeha.

Follow us on &

Copyright © 2018, UMA Broadcasting Ltd: www.waateanews.com