Pou Tēmara Tohu Reo Māori o Te Taura Whiri

Pou Tēmara Tohu Reo Māori

He mea whakamānawa a Ahorangi Pou Tēmara o te Whare Wānanga o Waikato i Ngā Tohu Reo i te Pō Mere, mo tōna whakapau kaha i te tini o ngā tau ki te whakatairanga i tō tātou reo. I whakatipuria a Tēmara i Ruatāhuna e ōna kaumātua, ā, no te taenga ki te kura takawaenga ka tīmata ia ki te kōrero Pākeha. Hei tāna, ko tōna reo tōna raukura tūpuna, tōna tānga manawa i tana whānautanga mai, nā wai rā, ka pakeke noa, anā, ka noho ko te reo hei oranga tinana mōna i roto i āna mahi katoa. Hei tāna, ma te katoa o Aotearoa te reo e whakarauora, Māori mai, tauiwi mai, ki te kore, ka mate. Hei tā te amorangi Māori tuarua o te Whare Wānanga o Waikato a Sarah-Jane Tiakiwai, he whakaihuwaka reo a Ahorangi Tēmara e whakahau ana i āna tauira kia hiranga, kia kounga.

Tohu roopu rangahau o te tau

Kua roa rātou e whakaarorangi ana i ngā hāpori Māori i roto i ā rātou rangahau, ā, nā tēra aronga kua whakawhiwhia te Pokapu Rangahau o te Whare Wānanga o Waikato, arā, Te Kotahi Research Institute ki te tohu roopu rangahau o te tau. Hei tā te kaiwhakahaere i Te Kotahi a Leonie Pihama, nā te roopu-ā-iwi o te Whare Wānanga, arā, na Te Roopu Manukura, te pokapū rangahau o Te Kotahi i whakatū, he hiahia nō rātou kia riro mā ngā kairangahau Māori ngā kaupapa Māori e ārahi.

Te tohu Erima Henare Reo Development Award

E mihi ana te māngai torangapū mō Tāmaki Makaurau a Peeni Henare i te whakaaro o te Manatū Whakahiato Ora kia whakaingoatia tētahi o ngā wāhanga o tā rātou rautaki reo Māori ki tōna pāpā. Ko tā te tohu Erima Henare Reo Development Award, he whakangungu i ngā kaimahi o te Manatū Whakahiato Ora ki te kōrero Māori mā roto atu i te kaupapa ako o Te Atārangi. I tae atu a Henare ki te whakapōtaetanga o ngā tauira tuatahi, ā, hei tāna, kaore e kore, ka harikoa tōna pāpā.

Whakawāteahia a Hurimoana Dennis

He wheako whakahumārire i te ngākau. Koirā ngā kupu kōrero a Pirihimana Hurimoana Dennis, whai muri iho i te rua wiki e whakawāngia ana mō te kāhaki rangatahi. I te mutunga iho, i whakawāteahia a Dennis i ngā hamene katoa i utaina rā ki runga i a ia. Hei tāna, ka nui tana mihi ki te kaiwhakawā me te roopu whakawā, i tā rātou kite atu kaore o rāua ko Pirihimana Vaughn Perry hara i roto i tēnei take. Hei tā Dennis, e tatari ana ia kia whiriwhirihia, mena rā ka whakahokia tōna tūranga Pirihimana ki a ia. Hei tāna, i a ia e tatari ana, ka haere tonu tāna mahi hei heamana o te marae o Te Puea me tā rātou kaupapa manaaki i ngā whānau rawa kore me te hunga kainga kore.

Hui ngā mātanga hauora ki roto i Te Whanganui-a-Tara

I te hui ngā mātanga hauora ki roto i Te Whanganui-a-Tara i ngā rā tata nei, ko te mahanatanga haeretanga o te ahuarangi tētahi kaupapa i āta kōrerotia e rātou. Hei tā Alex McMillan, tētahi o ngā kaihautū i te hui i kiia nei Ora Taiao, i te hui ngā māngai no ngā hohipera me ngā ratonga hauora e kōrero ana i ā rātou rautaki e manaaki ai rātou i te taiao i roto i wā rātou mahi. Hei tāna, he hononga motuhake i waenganui i te oranga o te taiao me te oranga o te tangata.

Follow us on &

Copyright © 2017, UMA Broadcasting Ltd: www.waateanews.com