September 12, 2017
Whakawāteahia ngā heitara a Wetex Kang
Whakawāteahia ngā heitara a Wetex Kang
Kua whakawāteahia e te Komihana Pooti o te motu ngā heitara i utaina atu rā ki runga i a Wetex Kang o te RTM, mō te utu Hainamana ki te pooti ki a ia. Ko Kang te māngai mō te RTM ki te rohe o Botany. Hei tā te perehitini o te RTM a Tukoroirangi Morgan, e ngana ana a wai ake rānei ki te tāwai me te whakaparuparu i te ingoa o Kang, koia i puta ai ēnei heitara hē.
Aotearoa hei whenua motuhake
Hei tā te māngai torangapū mō Manurewa, a Louisa Wall, e pai ana ki a ia kia āta matapaki tātou, kia āta taukumekume tātou i te tū a Aotearoa hei whenua motuhake arā, hei Republic, na te mea, kāore e kore, ka hua ake he kōrero whakanui, whakamana anō hoki i te Tiriti o Waitangi me tā tātou noho hei iwi taketake ki konei. Hei tā te kaiarahi i a Reipa, a Jacinda Ardern, kei te tautoko ia i te ariā kia tū a Aotearoa hei whenua motuhake i waho i te hītau o te Kuini o Ingarangi, ēngari, hei tā Wall, ma te Māori tēra kaupapa e ārahi, ngā kōrero mo tēra kaupapa e hautū.
Petihana kia turakina te pakoko o Marmaduke George
Kua kitea he rangaawatea e tau ai te puehu mo te pakoko o Marmaduke George Nixon, he Tianara o ngā ope hōia Pākeha i whakaeke i te rohe o Waikato ki te patu tāngata me te raupatu whenua i tēra atu rautau. Nā Shane Te Pou te pētihana kia turakina taua pakoko e tū nei ki Otahuhu, i kōkiri, a, hei tāna, e pai ana pea ki a ia kia tāpirihia he kōrero whakamārama ki taua pakoko e kōrero ana mo te hia rau uri o Rangiaowhia i mate, i te wā i tahu ai a Nixon me ana hoia i o rātou whare.
He Toki ki te Mahi
Me mahi tahi ngā iwi me ngā waahi mahi kia uru ai ngā rantgatahi Māori ki te rāngai mahi. Koirā te whakahau a Eru Tarena o te hōtaka a Ngai Tahu e kiia nei, ko He Toki ki te Mahi. Hei tāna, i roto i ngā tau tekau e tū nei, ka piki te nui o te hunga rangatahi Māori e kimi mahi ana, a, hei taua wā hoki, ka rītaia hāere te nui o ngā kaimahi Pākeha, nō reira, me kakamā te whakangungu i ngā rangatahi Māori, ko rātou hoki ngā ringa raupā e ora ai te rāngai mahi i ngā rā o āpōpō.
Whare ratonga ture hou ki Otautahi
Kua whakapuarehia he whare ratonga ture hou ki roto o Otautahi, ā, kua whakanikonikohia te whare ki ngā tauira toi a Ngai Tahu, otirā, ā te hapu ō Ngai Tuahuriri hei mihi mā te rāngai ture i te kaha ō Ngai Tahu ki te āwhina i te whakatūnga mai anō o Ōtautahi i te rū whenua nui o ngā tau nei. Hei tā te Ūpoko o Ngai Tuahuriri a Te Maire Tau, ko Te Omeka te ingoa o te whare, ā, ko te wawata kia hāneanea te wairua o te hunga, ka tomo ki roto ki te kimi āwhina mā rātou.
Tohu pukapuka a Pikihuia
Kua tohaina ngā tohu pukapuka a Pikihuia, ā, ko ētahi o ngā kaiwhiwhi tohu e whai ana i ngā tapuwae o o rātou mātua. I whai a Zeb Nicklin i te tohu mo te Paki Poto ki te reo Māori. Nā Tahu Pōtiki Te Maro-Doran no te Kāreti o Ōtaki i whai i te tohu mo te pakimaero pai ki te reo Māori, ā, ko Nikau Wi Neera no te Kāreti o Kāpiti te kaiwhiwhi i te tohu mo te pakimaero pai ki te reo Pākeha. I hoatu te tohu mo te tuhinga kiriata pai, ki a Aroha Awarau.
Copyright © 2017, UMA Broadcasting Ltd: www.waateanews.com