Jacinda Ardern hei kaiarahi tuarua mo Reipa
Kaore e kore ka whakatairangatia e Jacinda Ardern nga take e hangai ana ki te hunga rangatahi. Koira te whakatau a te kaiarahi i a Reipa, a Andrew Little. No tera wiki i toa ai a Jacinda Ardern, i roto i te kowhiringa pooti motuhake mo te tuuru torangapu o Owairaka, a, e kii ana te nuinga o nga matanga torangapu, ka kopoua ia hei kaiarahi tuarua i a Reipa hei enei rangi whakataa nei.
Panoni i te ingoa Duncan MacIntyre
Me panoni i te ingoa o te ipu whakaihuwaka o Te Matatini. Koira te karanga a te kaiarahi takirua i te RTM, a Marama Fox. I riro i a Whangara Mai Tawhiti te ipu Duncan MacIntyre i Te Matatini i tenei tau, engari, e patai ana a Fox i te patai, he aha tatou i rapa atu ai i te ingoa o tera tangata ra, ara, o McIntyre, ki tera ipu mana nui.
Te tukinotanga o nga tamariki i nga tau o mua
Ko Kahurangi Susan Devoy, kaikomihana whakawhanaunga-a-iwi, tetahi e akiaki ana i te Kawanatanga kia whakahaere whakatewhatewha e pa ana ki te tukinotanga o nga tamariki i raro i te maru o nga tari Kawanatanga i nga tau o mua. Hei taa Devoy, kei te huri tuaraa te Kawanatanga ki nga korero whai take, whai tikanga hoki e kii ana, tokomaha nga tamariki, te nuinga he tamariki Maori, i tangohia i o ratou whanau mo te kore noa iho, mo nga take paraurehe noa iho ranei, katahi ka tukinohia i a ratou e noho ana i raro i te maru o te Kawanatanga.
Te tono raupatu WAI 2-1-8-0
Hei tera wiki ka whakakukuu atu te Roopu Whakamana i te Tiriti ki te rohe o Taihape ki te wherawhera i te tono raupatu, WAI 2-1-8-0. Ka powhiritia ratou ki te rohe hei te ata o te ra hina, katahi ka tuu nga matanga hiitori nei, aTony Walzl, David Armstrong me Peter McBurney ki te taki i nga whakapapa hiitori e pa ana ki te raupatutanga o te whenua i Taihape. Ko nga mangai o te Roopu Whakamana, ko Kaiwhakawaa Layne Harvey, Ahorangi Pou Temara, Taa Douglas Kidd, Taakuta Angela Ballara me Taakuta Monty Soutar.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2017, UMA Broadcasting Ltd: www.waateanews.com
