Hei tua atu i te pikinga o ngā utu mō te hākinakina, ko te whai kaitūao hei whakangungu i ā tātou tamariki tētahi o ngā tino wero e pāngia nei ngā karapu hākinakina puta noa i te motu.
E ai ki te māngai o Poitūkohu Aotearoa, a Marsella Hippolite, he nui ngā whānau e hiahia ana kia uru ā rātou tamariki ki te hākinakina, engari kāore ētahi e whakapono ana kei a rātou ngā mātauranga, te māia, te wā rānei kia tū hei kaiako.
Hei tāna anō, i ētahi wā ka taupatupatu ngā whakataetae ki ētahi atu momo hākinakina, ā, ka kumea ngā whānau ki wāhi kē, mā reira ka uaua ake te whai tautoko pūmau mō ngā tīma.
