Ko te aroha te pou, poupoua kia mau. Ko te aroha te pou, tiritiria kia ū. Kia mau, kia ū, ki te pou o te aroha ki roto i tēnei whānau.
E whakaae ana Te Rūnanga Nui o Ngā Kura Kaupapa Māori o Aotearoa ki te whakataunga i whakaputaina mai e te Ratonga Ahumana Taimahi o Aotearoa mō ngā take e pā ana ki tētahi hononga mahi i ngā rā o mua me tētahi whakataunga whakaaetanga.
Hei tā te Kaitakawaenga, a Hohepa Campbell, e whakaae ana te rōpū ki ngā whakataunga a te Ratonga Ahumana Taimahi, ā, e mōhio ana hoki ki te hiranga mō te pupuri i te ngākau tapatahi me ngā tūmanako e herea ana ki ngā whakataunga whakaaetanga me te whanaungatanga ngaiotanga.
“E whakaae ana mātou ki ngā whakataunga a te Ratonga Ahumana Taimahi, ā, ka tuku hoki i tō mātou aroha nui ki ngā tāngata katoa kua pāngia e tēnei kaupapa. He taumaha ēnei momo take ki te katoa e whai wāhi mai ana, nō reira he mea nui kia anga whakamua tātou me te ngākau aroha, te whakaute me te aro nui ki tō tātou kaupapa,” hei tā Campbell.
“Ahakoa kua whakatauria tēnei take ināianei, kāore tō mātou aronga matua i te rerekē. Ko tā mātou mahi tonu, he whakarite kia riro tonu ā tātou tamariki, ngā whānau me ngā kura i te tautoko, i ngā mahi awhina whai hua me ngā ratonga mātauranga tino pai rawa atu.”
I kī anō Te Rūnanga Nui, e ū tonu ana rātou ki te kaupapa o Te Aho Matua me ngā wero nui e pā ana ki te mātauranga Māori i tēnei wā, tae atu ki tā rātou whakahē tonu i ngā panonitanga NCEA e whakaarohia ana e te Kāwanatanga me ngā kaupapa here whānui e pā kino ana ki ngā ākonga Māori me ngā kura puta noa i Aotearoa.
“Me noho tonu tō tātou kaha me tō tātou aro ki te tiaki me te whakatairanga i ngā kura kaupapa Māori mō ngā whakatupuranga e heke tonu ana,” hei tā Campbell.
Nā runga i te whakaute ki ngā tāngata katoa e whai wāhi mai ana, kāore he kōrero anō ka tukuna mō tēnei take.
“Kia ita te mauri.”
