February 20, 2025

Kei whea ngā kaiwhakaaweawe o Smear You’re Mea i te rangi nei?

Kawe Roes Posted On February 20, 2025

Kua puta te rā tuatoru o te ekenga paihikara a Ride for Talei e whakamahara ana i ngā wāhine Māori kia whakamātautauhia te waha kōpū, kei taka rātau ki te mate pukupuku.

Koia ngā kōrero a te kaiwhakahaere o Smear You’re Mea a Te Ururoa Flavell i a ia me tana ope eke paihikara, me ā ratau kaihāpai e patu ana i te huarahi atu i Tāmaki Makaurau ki Ngāmotu.

Nō te rangi nei wehe atu ai te ope paihikara nei i Piopio ki Waitara.

E toru ngā wāhanga o te haerenga i te rangi nei, tuatahi atu i Piopio ki Mōkau i Ngāti Maniapoto, ā, atu i Mōkau ki Urenui, ā, ka mutu ki te marae o Ōwae i Waitara ā te pō nei.

Hei tāna, he haerenga tēnei e whakaaweawe ai i ō tātau whāhine, i ō tātau whānau ki te tautoko i ō rātau wāhine ki te tiaki i ō rātau teke.

Hei āpōpō tīmata ai ā rātau whakatairanga whakamātautau i ngā whare hauora e whā e tāwhio ana i a Taranaki maunga e pātari ai ngā wāhine ki te whakamātautau waha kōpū.