October 04, 2024

Take Tatauranga | Neke atu i te 200,000 ngā tāngata o Aotearoa he kōrero i te reo Māori

Kawe Roes Posted On October 4, 2024

Kua rarahi ake ngā tāngata kōrero Māori i te motu. Koia ngā kitenga i te tatauranga ā-motu e kī nei he neke atu i te 2 rau mano ngā tāngata e mea ana he kōrero Māori rātau.

Ko te reo Māori te tuarua o ngā reo matua ka kōrero whānuitia i Aotearoa, ā, i ngā rima tau nō te tau 2018, kua piki ake te iwi kōrero Māori mā tōna 28 mano tāngata.

Ko tā te pātai tatauranga mō ngā reo e kōrerotia ana, he uiui i te tangata mō tana āhei ki te kōrerorero mō ngā mea huhua o ia rā.

I te tau 2023, he 4.3 ōrau o ngā tāngata i kī, ka taea e rātou te kōrerorero ki te tangata ki te reo Māori.

Hei tā Tatauranga Aotearoa ko Tūranganui-a-Kiwa tētahi wāhi e rere kaha ana te reo, he 16.9 ōrau o taua rohe e kōrero ana i te reo, manohi anō, he 10.1 ōrau o ngā hunga i Te Tai Tokerau me te mea hoki he nui ngā Māori kei te noho ki aua takiwā e rua.