June 19, 2024

Hinerangi Himiona | Kia kaua e tukino tō mātou maunga whakahī

Reuben Epiha Posted On June 19, 2024

Reuben Epiha Hinerangi Himiona | Waiho i tōku maunga

Download Audio

Kia kaua anō e tukino te tupuna maunga o te rohe o Whangaroa ki Te Tai Tokerau.

Koia te kōrero a te uri o Ngāti Ruamahue i te Tai Tokerau a Hinerangi Himiona, whai muri i tana tū whakahē ki mua i te komiti kōwhiri ki te pire whakahoro pūāhei i tēnei wiki.

Ko ngā pae maunga o Whakaraara i te Pēwhairangi, he kīkī i te konakōhatu, arā te Lithium, ā, kua roa ngā kamupene maina e whai ana kia keri i te whenua ki reira.

Hei tā Himiona, ko te āwangawanga i tēnei pire whakahoro pūāhei, ko te āhei pea ā ētahi kamupene ki te keri anō i tō rātou tupuna, me te kore whai wāhi a te hau kāinga ki ngā whakataunga.

“I rongo mātou i ngā tau kua pahure e hiahia ana ētahi mining companies ki te haere mai ki roto i tō mātou rohe i runga i tō mātou maunga ki te tango i ngā rawa i roto i te whenua. Ko tētahi ko te Lithium me ētahi atu mea. E hiahia ana rātou ki te haere mahi tonu i ō ratou tirotiro haere i roto i te whenua, ā, kihai mātou e hiahia ana ki tera mahi i roto i tō mātou rohe.”