Listen Now: 
Ka whakatūhia ngā taupuni ohotata, arā emergency pods, ki ngā marae e 24 o Ngāi Tahu hei wāhi whiwhi rauemi i te wā o te waipuke, o te rū whenua rānei.
E ai ki te Pou Whakahaere Mahi Tika o te iwi, a Ben Bateman, he taiaroa ā-poti ngā taupuni ohotata, ā, he kai, he wai, he taputapu ohotata ki roto.
Hei tāna, i ara ake te whakaaro kia whakatūhia ngā taupuni ohotata whai muri i ngā waipuke i ngau ai Te Tai Rāwhiti i ngā tau e rua kua taha ake nei.
Kei te mahitahi te iwi me Te Puni Kōkiri ki te whakatū i ngā taupuni ohotata, ā, i tuwhera te mea tuatahi ki Ngā Hau e Whā Marae i Ōtautahi i te Tūrei ka hori nei. Ka tuwhera te mea tuarua ki Arowhenua Marae i Temuka.
Ka kī a Bateman e hiahia ana ngā marae ki te āwhina i ō rātou hapori i te wā o te aituā, ā, ka whakangunguhia ngā hau kāinga i te whakamahinga o ngā taupuni ohotata.
