He kuia taikaha a Mīria Tauariki: Rāhui Papa

Waatea Team Rāhui Papa

Download Audio

He taniwha, he tupua kua huri ki tua o Paerau, o Ngāti Maniapoto kua riro ki te pō i ngā rangi tata nei, ā, ko Mīria Tauariki tēnā.

Koia ngā mahara a Rāhui Papa, māngai o te Kīngitanga mō te kuia o Te Rohe Pōtae, e 86 ōna tau kua mate nei.

Hei tā Papa, he kuia taikaha tēnei hei whakaara ake i ōna ake whakaaro hei painga mā te iwi.

Hei tāna tonu, “Ko te momo o te kuia nei he kuia amuamu, he ngutungutu kuia, ka mutu he wahine whakaara kaupapa i te wā e tika ana. He wahine tohetohe ki ngā kaupapa e pāwera mai ana ki tōna ngākau. Kāore nei tēnei kuia i mataku ki te whakaputa i ōna whakaaro ki te marea. Koirā te momo o tēnei kuia, he wahine kōrero ki te rae o te tangata.”

Kei te marae o Tokikapu i Waitomo te taonga o mate e tīraha mai ana i tēnei wā. Ka nehu a Mīria Tauariki ā te Paraire e tū mai nei.

RELATED NEWS

Ko te ngākau aroha te takoha a Tā Wira Kua tau atu te hōtoke ki Ukraine Ko ‘Matariki Kāinga Hokia’ te karanga