Mā ngā kiriata poto e whakaatu ana i te toi mā te one e whakaū ai i ngā ture o te reo. Koia nei te kī a te pou toko akoranga o te kamupene TupuOra, a Jarred Boon, whai muri i te whakarewatanga o te rauemi ako hou e kīia nei ko Te Onekura.
E ai ki a Boon, he mahi ngātahi tērā i waenga i ngā kaiako reo a TupuOra me te ringatoi onepū a Marcus Winter.
Hei tā Boon, “He wero kei mua i a rātou, i te hunga e ako nei i te reo, i te hunga rānei kua roa nei e ako ana i te reo, koia tēnei ko te whakaū. Nō reira, e whakaaro ake mātou o TupuOra ki te hanga i tēnei rauemi e noho māori ai te reo, e noho tangatawhenua ai te reo i waenganui, i roto rānei, i ngā ākonga. Ā, ka mutu, he korero ake i ētehi kaupapa ka kaha kōrerotia i te kāinga. Nō reira, koia tēnei te whakatauiratanga o te reo i te kāinga me te āwhina i ngā tauira ki te whakaū i tā rātou i ako ai.”
Mātakihia ngā kiriata i te pae tukutuku tupuora.co.nz
