Listen Now: 
Ka rua wiki te roa e rere ai te tiko ki te Waitematā. Koia te kōrero a te āpiha whakahaere matua o Watercare, hei tā Mark Bourne.
Nō te wiki rā, he waru miriona rita te nui o te paru ka puta ana ki te moana ia te rā, nā te tānuku o te kōrere paru nui o Ōrākei i Pānera.
I tā mātou hōtaka parakuihi a Paakiwaha i te ata nei, i kī a Bourne he nui tana pōuri kei te patua tonutia te mauri o te Waitematā. Hei tāna anō, kei te hoahoatia tētehi kōrere hou hei autaki i te wāhanga o te kōrere kua tānuku, heoi, he mahi matatini tērā, ā, kāore e rite i mua i te rua wiki.
I tēnei wā, e ai ki a SafeSwim, kāore e haumaru te kaukau i ngā tuaone katoa o te whanga o te Waitematā, ā, kua rāhuitia e Ngāti Whātua te kaukau me te hī ika.
RELATED NEWS
