Listen Now: 
Download AudioKua puta ngā mahere maha i ō te hunga pārurenga kua patua kinotia rawatia e te tangata, kua karawhiu rānei ki ngā tūkinotanga ā-wairua, ā-tinana, ā-whakaaro anō hoki.
Nā te rōpū Tū Tama Wahine o Taranaki i whakahaere kia puta mai ngā kōrero i te kaupapa rangahau e kī ana ko ‘He Waka Eke Noa’.
E ai ki te māngai mō te kaupapa nei, e ai ki a Shirley Simmonds, ko te rautaki matua e ai ki te hunga mōrehu kia whakatakatoahia, kia whakaritea hoki e ia ōna whanonga e ai ki tāna tikanga ake.
Hei tā Simmonds anō e ai ki ngā he maha ngā mahere hei āwhina i te tangata ki te kaupare i ēnā tūkinotanga, arā, ko te whakawhitiwhiti kōrero, ko te toro atu ki ngā hoa tautoko, ko te karo hoki i te waipiro, i ngā whakapōauau, waihoki ko te ū, ko te tahuri rānei ki ngā tikanga Māori hei āwhina i te tangata kia piki ake anō ai tōna ihi, tōna wehi.
“Kei a tātou hoki te rongoā, nē. Ko te tokomaha o ngā kaiwhakautu i whāki mai ki roto i te uiuinga nei, ko te rongoā ko te reo. Ko te rongoā ko ngā kōrero a kui mā, koro mā. Ko te rongoā ko te whanaungatanga, he whai hononga, aua momo mea, ko te tikanga, nē. Nō reira, ahakoa i puta ngā mamae i ēnei tatauranga, ka taea hoki te kite i ngā rongoā.”
RELATED NEWS
