Listen Now: 
Download AudioKua hinga atu te totara haemata o te wao tapu nui a Tāne o roto o Te Ati Awa i Te Awakairangi o Te Upoko-o-te-Ika. Arā ko Kara Puketapu, e 89 ōna tau ka ngaro atu nei i te tirohanga kanohi, ā, he nui ōna mahi hei whakarauora i te ahuarea Māori.
I ōna rā koia hoki te taiohi Māori tuatahi i whai wāhi ki te tari take Māori hei hekeretari mā te Minita Māori i taua wā o te 70.
Nāna hoki te whakaaturanga e karangahia ana ko Te Māori, i tuku, hei tipihaere i te ao hei whakaatu i te mana nui o tāua te Māori mā te whakairo, mā te kākahu, mā te pounamu, ērā taonga tonu o te ao kōhatu.
Waihoki, nōna te hui i whakahaere kia puta ai te kōrero, me whakaako a tātou tamariki ki te kōrero Māori i te kura i te kōhanga reo hoki.
Kei te takoto te taonga o mate ki runga o tōna marae o Waiwhetū, i Te Whanganui-a-Tara. Kia aro atu mātou ināianei ki a Kaanihi Butler-Hare, hei hoki mahara ki tēnei tino rangatira a Kara Puketapu kua whetū rangitia.
