Listen Now: 
Download AudioE 2000 ngā tamariki kei ngā kura hourua e whakaako ana i te motu, otirā, e 68 ōrau o aua tamariki he tamaiti Māori, tāpiri ki tēnā e 63 ōrau he taitamatāne.
Nō reira, e whakakipakipa ana Te Kaikōmihana mō ngā tamariki a Frances Eivers kia kaha ake, kia tika ake hoki rā te kāwanatanga e whakaako ana i ā tātou tamariki i ngā kura hourua, nō te mea ko ngā tamariki whakaraerae kei raro tonu e putu ana.
Waihoki, ki te kore rātou e whakawhiwhi ana i te NCEA 2, ko te whakapae he nui ake te wāhi mā tēnei hunga kia mauheretia e te ture, kia kore e whiwhi rānei i te pūtea e toiora ai te tangata.
I puta ēnei whakahau āna, nō te terenga mai o te rīpoata e kīia ana ko Alternative Education in Aotearoa, nā Te Tari Arotake Matua i whakaputaina.
E ai ki te māngai mō te Kaikōmihana mō ngā tamariki, e ai ki a Rukuwai Allen me rata pai te tamaiti ki te mātauranga me ōna tini āhuatanga kataha ia ka eke ki ngā taumata o angitū.
“Ko tētahi o ngā whītiki e ora ai o tātou whānau ko te whai i tētahi ara ako”
