Listen Now: 
June 23, 2023
He aha te hononga o ngā iwi taketake rerekē o te ao, ki te wai?
Waatea Team
Posted On June 23, 2023
Download AudioKoia tētahi o ngā tino pātai ka whakautua i te whakaaturanga toi o Naadohbii: To Draw Water ka tū ki Te Whare Toi o Te Pātaka ki Porirua.
Ā te tuatahi o Hūrae tuwhera ai tē whakaaturanga toi nei mai i ngā iwi taketake o Ahitereiria, o Kānata me Aotearoa, ā, ko te aronga matua ko te hononga o tēnā iwi, o tēnā ahurea, ki tēnei mea te wai.
Hei tā tētahi o ngā ringa toi o te kaupapa, hei tā Jeremy Leatinu’u o Ngāti Maniapoto, me Ngāti Hāmoa, nō te wā o te kōwheori i tino puta ai ngā aronga rerekē rawa a te tangata ki te wai, ā, ko tōnā he kiriata e whakatairanga ana i te tirohanga a te tangata noho taone ki te wai, i tēnā o te tangata noho ki tai, me te tangata noho ki te waokū.
“Nā reira ko tāku kiriata he whakahaere i te tirohanga o te kaimātakitaki ki ēnei mea, ēnei āhuatanga, ēnei tikanga, ā tātou e noho ana i te taone ki tēnei mea te wai. He āhua rerekē pea tēnei tirohanga, ēnei mahi, ki te tangata e noho ana ki te taha o te moana, me te tangata noho ana ki te ngāhere rānei. Nā reira he tirohanga noa mai i te tangata noho i te taone.”
