Listen Now: 
Download AudioKo Te Tūkohu Ngāwhā he hui ahurei pūtaiao Māori, e whakamānawa ana i ngā tamariki kei ngā kura i te rohe o Te Arawa ki te whai whakaaro ki ngā kaupapa taiao, me ngā take e whakapiki ai, e whakaheke ai hoki i tana hauora.
E rima ngā wāhanga ka whakamātauhia, ko te kounga o te wai, te haumaru koiora, te kanorau koiora, te toitūtanga me te mātauranga Māori.
Hei tā tētahi o ngā kaiwhakarite i te kaupapa, hei ta Haimona Te Nahu, neke atu i te tekau mā rima ngā kura kua rēhita atu i tēnei wā, ā, kei te karanga atu ia ki ngā kaiako kura Māori kia peka hoki rātou ki te kaupapa nei.
“Ko tāku e manako nei, kia kitea tētahi kura kaupapa Māori, kaore ano kia kitea tētahi kura kaupapa Māori ki tēnei o ngā kaupapa, nā reira te manako nui mā tēnei kōrero ki runga reo irirangi e rongo ai nga kaiako reo Māori, ngā kaiako kura kaupapa Māori kia tukuna ā koutou tamariki ki tēnei kaupapa. Ko ngā tau, waru ngā tau ki te tekau mā waru tau te pakeke o ngā tamariki e ū ai ki tēnei kaupapa.”
Ka tū te hui ahurei nei hei te 27-29 o Hurae, ā, hei te 15 o Hurae kapi ai te rehita.
Tirohia ngā whakamāramatanga ki konei.
