March 21, 2023
Me whakakati te mawehe tamariki ki te kura
Kua tae ki te wā kia whakakati i te mawehe tamariki ki ngā kura nā runga i te whakaaro he rerekē te āheinga, te mātāpono hoki o ia tamaiti, o ia tamaiti.
Koia nei te kī a te perehitini tuarua o Te Riu Roa, a Ripeka Lessels, whai muri i te whakarewatanga o tētehi rautaki nā te Tāhuhu o te Mātauranga me ngā mātanga ako e whai ana kia mutu ai tēnei mahi e kīia nei te mawehe tamariki, ara, te, streaming, i Aotearoa i mua i te tau 2030.
Hei tā Lessels, ko te mawehe tauira he mahi kaikiri nō tērā atu rautau. E ai ki te rangahau ki roto i te rautaki, ko Kōkirihia te ingoa, mā te mahitahi a ngā tamariki katoa ki te akomanga, ahakoa te āheinga o te tamaiti, e angitu ai te katoa.
E ai ki a Lessels, “Ko tā tā Kōkirihia e whakaputa atu ai, whakamutuhia tēnā mahi. He kounga kei roto i te tamaiti, ahakoa ko wai. He pūkenga kei roto i te tamaiti, ahakoa ko wai. E ai ki ngā raraunga i puta mai i tēnei rangi, ko ngā tamariki kaha ki te mahi, waihohia ki roto i ngā rūma me ngā tamariki mixed ability groupings – kaua e whakawehewehehia ai. Waiho mā ngā tamariki katoa i te rūma hei akiaki i a rātou.”