February 22, 2023
Kua tūtū te puehu ki Ngā Ana Wai
Kua tūtū te puehu ki Ngā Ana Wai o Tāmaki Makaurau i te haruru a te kaihaka, me te pāpāoro a te kaitautoko.
Nō te ata nei, wāwāhi ai te rōpū o Muriwhenua i te taha ki te whakataetae o Te Matatini Herenga Waka Herenga Tangata 2023.
I ngā uiui katoa i whakaāe ngā kaikōrero ko te whakawhanaungatanga tētehi o ngā hirahiratanga, ā, hei tā Awatea Wihongi o te kapa Angitū, ko te tū kotahi me tōna Pāpā te mea nui ki a ia.
“Ko te painga nui rawa mōku ko te tū ki te taha o taku pāpā, i te mea he mea nui tērā, te tū i te taha o tō whānau ōtirā taku pāpā i te mea kāore ia i te rangatahi, me kī. Nō reira, i ētahi wā he tino uaua ki te mahitahi ki a ia, heoi ko te mea nui e tū ana au ki tana taha, otirā te taha o taku tungāne.”
Ka tū a Wihonga me tana whānau ki te kapa Angitū hei te ata āpōpō, ā te Taite.