Listen Now: 
Download Audio—
–Kei nga korero i tenei haora;
– kei te tuwhera tonu tetahi roopu kohi para ki Tamaki Makaurau, whai muri i nga waipuke o te takiwa.
– Kua kopoua tetahi heamana hou ki te Poari hi ika o Sealords
Ko enei kaupapa, me nga kaupapa hakinakina e whai ake nei
Ki Tāmaki Makaurau inaianei. Mēna kei waho tonu i tō whare ngā para waipuke pērā i ngā taputapu a-whare, me waea tōtika atu ki te kaunihera o Tāmaki Makaurau, mā rātou e kohi.
Koirā te kī a Herewini Te Koha, Tumuaki Huanga Māori ki te kaunihera. Hei tāna, ahakoa neke atu i te kotahi rau, rua tekau ngā taiaroa para kua horaina huri noa i te rohe, tērā pea kua mahue ētēhi rori.
Ka kī tonu a Te Koha kua tekau ra nō te waipuke inaeanei, me te aha anō he nui ngā ngarara mōrearea e kitea ana i aua mea mākū katoa, ā, ko te kāhekaheka te tūraru nui rawa.
Mēnā ka whakatata atu te tangata ki aua para, me mau maruhā ia hei whakahaumaru i tōna hauora.
Ki te hiahia koe i tētehi taiaora para mō ngā taputapu mākū, waea atu ki 0800 22 22 00.
Kua kopoua te heamana ngaio a Jamie Tuuta hei hemana hou o Sealord, tētehi o ngā kamupene hī ika nui rawa i te Tuakoi Tonga (Southern Hemisphere) .
Ā te tuatahi o Apereira whakakapi ai a Tuuta i a Whaimutu Dewes, nāna te tūru heamana i whakahaere i ngā tau e whitu kua taha ake nei.
Neke atu i te kotahi mano ngā kaimahi a Sealord i Aotearoa, ā, neke atu i te rua rau kei tāwāhi. E iwa tekau ōrau o tana hopuhopu e kawe ana ki tāwāhi.
I tēnei wā, ko Tuuta te heamana anō hoki o te kamupene hī ika a Moana Aotearoa. Nā Moana tērā i haurua o Sealord, nā te kampene Hapanihi a Nissui tērā atu haurua.
Kua whakaingoatia te tumu whakarae o Te Rūnanga Nui o Te Aupōuri, a Mariameno Kapa-Kingi, hei kaitono Pāti Māori ki te tūru Māori o Te Tai Tokerau.
I tū a Kapa-Kingi i taua tūru i te pōtitanga o 2020, ā, i hinga ia i a Kelvin Davis. Hei tā Kapa-Kingi, kei te tū anō nā runga i tōna hiahia ki te whakanui i te reo o ngā whānau ki roto i ngā kaupapa e pā ana ki ō rātou oranga tonutanga.
Ko te reo tērā o Mariameno Kapa-Kingi. Ka heke iho ia i tana tūranga ā te Akuhata
Ma Ranginui me Papatuanuku te kapa riiki Maori e arahi i ta ratou eke ki te papa takaro i tenei wiki, i te tukinga NRL Taketake ki te kapa Moemoea.
Koia te korero a te kaitoi nana nga poraka takaro a te kapa i ta, a David Panapa.
Hei tana, i hiahia ia ki te ta i tetahi korero e hangai ana ki nga atua me nga purakau Maori, kia ako ai nga hunga o waho i te whenua i nga korero mai i te ao-Maori.
Hei tana, ko Ranginui te pikitia o mua, a, i te ao maori, he tohu a ranginui i te matauranga me te oranga tangata, ka mutu, ka noho ia ki mua i te poraka. Kei muri i te poraka ko Papatuanuku, e tohu ana i te whanautanga o nga mea katoa ki te ao, ko ia hoki te wahi e hoki ai ratou i te mate.
Kua whakatauhia e nga kaitakaro Opango, e Aaron Smith raua ko Beauden Barrett ka takaro ke ratou ki Hapani a tera tau, ki te karapu o Toyota.
Na te roopu whutupooro o Aotearoa te panui i tautoko inapo, kua hainahia e Smith, tetahi kirimana roa, heoi kei te tuwhera tonu nga tatau ki a Barrett ki te hoki mai ki Aotearoa a te 2025.
Hei ta Barret, e koa ana ia ki te takaro tahi ki tana hoa i Hapani.
E whai ana tenei panui i ta Ardie Savea panui i te timatanga o te wiki e mea ana ka hunuku hoki ia ki Hapani ki te kapa Kobe Steelers. Hei tana, ko te take matua, ko te putea, kaore ia e teka, ko tana hiahia ko te whakarite i tona whanau mo nga ra o muri i te whutupooro.
Hei a muri i te whakataetae kapu o te ao wehe atu ai ratou ki reira.
RELATED NEWS
