Listen Now: 
Download Audio—
–Kei nga korero i tenei haora;
– Na nga akoranga o mua, me nga whakahokinga korero hoki i whakatau ai ko tetahi o nga tino aronga a nga Tatauranga o te Motu 2023, kia kite ai nga hua mo ngai Maori.
– Mā ō koutou tūpuna koutou e tiaki. Koia te whakaaro auaha i hua ai tētahi whakaari Maori hou.
Ko enei kaupapa, me nga kaupapa hakinakina e whai ake nei
Na nga akoranga o mua, me nga whakahokinga korero hoki ko tetahi o nga tino aronga a nga Tatauranga o te Motu 2023, kia kite ai nga hua mo ngai Maori.
Koia te korero a Tatauranga Aotearoa i tetahi paanui paapaaho i tenei ra.
Hei ta te Tumu Tuarua o Tatauranga Aotearoa, hei ta Simon Mason, ma nga korero ka kohia ki nga tatauranga e whakaputa ai he ao hou ma nga whanau me nga hapu.
Hei ta Mason, kaore i eke nga tatauranga o te tau 2018 mo ngai maori, mai i te ahua o te kohi i nga tatau, ki te ahua korero ki nga kaitono.
Hei ta Mason ano, e kaha whai ana a Tatauranga Aotearoa kia tu hei kai mahitahi i raro i te mana o te tiriti o Waitangi, a, e whakapono ana ia, kua whakaritea nga tatauranga o te tau nei mo te painga ake o ngai Maori.
Mā ō koutou tūpuna koutou e tiaki. Koia te whakaaro auaha i hua ai tētahi whakaari Maori hou.
Nā te kaiwhakaari a Tainui Tukiwaho te whakaari a Hemo is Home i tuhi, me āna tamariki tokorima, a Mia (17) rātou ko Letoya (16), ko Paku(16), ko Te Rongopai (10) me Jade (12), ā, hei tā Tukiwaho, nā rātou te tuahangata a Hemo i whakaora, he tamaiti whakatipua e ona tupuna kēhua ki te urupā.
Anei nga whakamarama a Tainui Tukiwaho.
Ā te tuatoru o Māehe tuwhera ai te whakaari ki te whare tapere hou o Te Pou ki te uru o Tāmaki Makaurau.
Ki te toa ngā pāti Nātional me ACT ā te pōtitanga kei te heke mai, ka whiua te iwi Māori ki raro i te pāhi, ka kopenutia, ka whakamatea.
Koinā te kupu a Minita Willie Jackson nō re Pāti Reipa ki te pae tukutuku a Newsroom.
Heoi i tino tere te upoko o ACT, a David Seymour nō Ngāpuhi, ki te whakahoki kōrero. I tētehi pānui pāpāho i tukua ki te ao pāpāho i te ata nei, i kī a Seymour me kaha tātā te Pirimia a Chris Hipkins ki a Jackson mō ana kupu kaikoka.
Hei tā Seymour anō, kua kore a Jackson e mahi ana hei kaiwhakapātari ki te reo irirangi, he Minita o te Karauna kē. Nō reira ko tana kōrero he tūkino, he wehenga tāngata, he mōrihariha. Ka kī tonu Seymour, i te tau kua hori nei, kua kītea kētia te nui o ngā kōrero kino i ngā take tōrangapū, ā, kāore te hapori e hiahia ana ki te rongo i ngā kupu weriweri.
Ko te wikitoria nui a te Haika a nga Tamatoa, ko te hoki mai ki tona turangawaewae, patata atu ki tona whanau.
Koia te korero a Chance Nikol-Klokstad, mo tana hokinga mai ki te kapa Tamatoa i tenei tau, whai muri i tana wehenga i te kapa e rima tau ki muri ki nga Canberra Raiders.
Hei tana, kei te kainga ia inaeanei, a, kua roa ia e hiahia ana ki te hoki ki te kapa, heoi kaore ia i mohio ka pehea tera e hua ai.
I tera tau, i whakataka ia ki te kapa NSW Cup, a, hei tana i tino rongo ia i te pouri. Apiti atu ki tena, i Aotearoa tonu ana tamariki tokorua, a, i te kainga nei tona ngakau.
Hei ta Klokstad kua whai oranga ano ia i tana hokinga mai.
Hei te Taite tu ai ta ratou keemu whakamahana tuatahi ki nga Taika.
E hikaka ana te koromatua hou o Rotorua i te taenga atu o te Keemu Taketake NRL ki te takiwa i tenei wiki.
Hei ta Tania Tapsell, kua rongo te taone i te ngau o taemaha i nga tau e toru kua pahure i te rere haere o te kowheori, me te haukoti o nga turuhi ki te whenua. I kii tonu ia, ma te kaupapa nei e whai ora ano ai nga pakihi o te taone.
Hei ta Tapsell tonu, ma te keemu nei e taea ai e te taone o Rotorua, te whakaatu atu ko wai ratou ki te ao. He nui te keemu riiki ki Rotorua, a, ma konei hoki e taea ai e nga rangatahi te tutaki, te kite hoki i a ratou toa o te keemu.
A te Raahoroi, tu ai te keemu nei ki Rotorua International Stadium.
RELATED NEWS
