Listen Now: 
Download Audio–Kei nga korero i tenei haora;
– Me panoni pea i nga ahuatanga waihanga whare. Koia tetahi o nga whakautu a te koromatua o Tamaki Makaurau ki nga waipuke
– Kua tutukihia te ohaki me te moemoea a Te Rangi Hiroa
Ko enei kaupapa, me nga kaupapa hakinakina e whai ake nei
Me panoni pea i nga ahuatanga waihanga whare.
Koia tetahi o nga whakautu a te koromatua o Tamaki Makaurau, a Wayne Brown ki nga take waipuke i te taone.
I tenei wiki i huri haere a Brown i te takiwa ki te titiro ki nga hapori, me a ratou mahi ki te kaupare i nga waipuke a, inanahi i tau mai ia ki Nga Whare Watea Marae.
Hei tana ko te mahi tuatahi ko te whakawatea i nga para, kei huri ke hei mate hauora.
Katahi ka huri te aro ki nga mahi whakatikatika whare. Hei ta Brown, me ata whai whakaaro nga hunga ki te take o te wai me nga tohu huarere, ka mutu, te wahi hoki ka whakatu whare.
Hei tana me hiki nga whare, kia waipuke te papa, kaua ko te whare.
Kua tutukihia e tetahi roopu raranga, te ohaki me te moemoea a Te Rangi Hiroa ki te ako kia pehea te raranga i tetahi hera Maori.
I taua wa, i te tau kotahi mano e iwa rau e rua tekau ma rua, kotahi noaiho te hera Maori i te ao, a, i te noho ia ki tetahi whare pupuri taonga i Ranana.
I mohiotia whanuitia a Te Rangi Hiroa mo ana mahi hei takuta, hei kaiarahi pakanga, hei mema paremata hoki, a na tona awangawanga kei mate te matauranga tuku iho ra, i wero atu ia ki nga tangata o Aotearoa ki te whai ano i aua matauranga.
Kotahi rau tau ki muri a kua eke.
E whakaatu ana te Heera nei ki te Whare Ahurea o Hihiaua ki Whangarei, a, hei ta nga kairaranga, he mea hanga te heera na nga ahuatanga me nga rauemi i whakamahia hoki e ratou e rua rau tau ki muri.
Ma te kaupapa o Waitangi ki Waititi e whakatinana ai te whakatauaki a Kahurangi June Mariu e mea nei, kokiritia i te kotahitanga.
Koia te korero a te Pou Tikanga o Te Whanau o Waipareira, a Maria Pare Te Whiu, hei tana he mea whakakipakipa tenei i te wairua o ratou i raru i nga waipuke i te uru o Tamaki Makaurau i tera wiki, a, ki te whakanui i te tiriti hoki.
Ko Maria-Pare Te WhiuE hikaka ana te koromatua hou o Rotorua i te taenga atu o te Keemu Taketake NRL ki te takiwa a tera wiki.
Hei ta Tania Tapsell, kua rongo te takiwa i te ngau o taemaha i nga tau e toru kua pahure i te rere haere o kowheori, me te haukoti o nga turuhi ki te whenua. I kii tonu ia, ma te kaupapa nei e whai ora ano ai nga pakihi o te taone.
Hei ta Tapsell ano, ma te keemu nei e taea ai e te taone o Rotorua, te whakaatu atu ko wai ratou ki te ao. He nui te keemu riiki ki Rotorua, a, ma konei hoki e taea ai e nga rangatahi te tutaki, te kite hoki i a ratou toa o te keemu.
A tera Raahoroi, tu ai te keemu nei ki Rotorua International Stadium.
Kei mua tonu nga ihu o te Kapa Breakers i te turanga tuarua o te whakataetae NBL, whai muri i ta ratou eke i nga Illawarra Hawks e iwa tekau ma tahi ki te waru tekau ma tahi inapo.
Me toa hoki ratou i ta ratou tukinga whakamutunga ki nga Brisbane Bullets apopo, kia noho tonu ki taua turanga. |
Hei ta ratou kaiako matua, hei ta Mody Moar, he pikinga nui tera i te tau o mua, i ta ratou mutu ki te turanga tuangahuru, a, e whakapono ana te kapa ki a ratou ano.
Ki te mau i nga Breakers te turanga tuarua, ka uru totika atu ratou ki nga whiringa whaiti, a, ka takaro hoki aua keemu ki te kainga.
Hei ta Moar ano, koia te whainga matua, kia takaro i nga whiringa whaiti ki te Aotearoa.
RELATED NEWS
