Ngā Kawepūrongo a Waatea | 4pm

Kaore nga kitenga o te ripoata a Oranga Tamariki i te mea hou ki te ao Maori.

Koia te korero a te kaitohutohu mataamua i te tari Tiaki Tamariki a Rukuwai Tipene-Allen.

Hei ta te ripoata tekau ma toru orau noaiho nga tamariki maori e mohio ana i o ratou hononga a whakapapa, a, hei ta Tipene-Allen, kei te kino ke hoki taua tatauranga.

Kua whakatauhia e te reo tataki o te motu, ka paahotia mataorahia e ratou te katoa o Te Matatini 2023 ma runga i ta ratou teihana tuarua, ma runga ipurangi hoki.

Hei ta te reo tataki, ka paahotia mataorahia nga rangi e wha o te whakataetae mai i te waru karaka i te ata, ki tonu mutunga i te ahiahipo.

E ai ki te Ringa Tohu Tuarua i nga Rarangi Take o te Reo Tataki, e ai ki ta Nevak Rogers, matua a Te Matatini ki nga mahi whakarauora i te reo maori, a, e koa ana ratou te tuku i tenei kaupapa ki te ao.

Koianei hoki te wa tuatahi ka paahotia nga rangi katoa, a, hei ta Rogers ano, na te kaha tupu o te kapahaka i Aotearoa, a, huri noa i te ao hoki, i pera ai.

Ka tu Te Matatini Herenga Waka Herenga Tangata a te rua tekau ma rua, ki te rua tekau ma rima o tenei marama ki nga ana wai i Tamaki Makaurau.

I tera tau i te takaro whutupooro ia i te tai tokerau, a, i tenei tau kei kite pea i a ia e mau ana i tetahi poraka tamatoa.

Pera i tona matua, tetahi o nga opango o mua a Sid Going, i tupu a Kalani i te whira whutupooro ki te karapu o Mid Northern, i Te Taitokerau, heoi i tenei tau kua whai wahi atu ia ki te kapa tuarua a nga Tamatoa, a, i tenei wiki i whakapikia ia e te karapu ki te whakangungu tahi ki te kapa matua, hei whakarite mo te keemu whakamahana ki nga Taika a te rua wiki.

Hei ta te ripoata kei te Puna, tokotoru ratou kua whai wahi atu ki te kapa, ko Going, ratou ko Solomon, Vasuvulagi, ko Eiden Ackland.

I tenei wa e wha tonu nga turanga kirimana e tuwhera ana ki te kapa Tamatoa.

E hikaka ana te koromatua hou o Rotorua i te taenga atu o te Keemu Taketake NRL ki te takiwa a tera wiki.

Hei ta Tania Tapsell, kua rongo te takiwa i te ngau o taemaha i nga tau e toru kua pahure i te rere haere o kowheori, me te haukoti o nga turuhi ki te whenua. I kii tonu ia, ma te kaupapa nei e whai ora ano ai nga pakihi o te taone.

Hei ta Tapsell ano, ma te keemu nei e taea ai e te taone o Rotorua, te whakaatu atu ko wai ratou ki te ao. He nui te keemu riiki ki Rotorua, a, ma konei hoki e taea ai e nga rangatahi te tutaki, te kite hoki i a ratou toa o te keemu.

A tera Raahoroi, tu ai te keemu nei ki Rotorua International Stadium.