Listen Now: 
Download Audio—
-Kei nga korero i tenei haora;
– Ka tirohia nga tatauranga kowheori hou mo te wiki kua taha ake nei.
– Ma tetahi kaupapa hari, ma tetahi kaupapa koa e whakakotahi ano ai tetahi hapori ki te tauihu o te waka a Maui.
Ko enei kaupapa, me nga kaupapa hakinakina e whai ake nei.
Ki nga tatauranga kowheori hou mo te wiki kua taha ake nei.
Tokoiwa nga aitua hou kua ripoatahia i tenei wiki, he hekenga tera i nga aitua e toru tekau ma tahi o te wiki i mua, a, kua piki te kaute inaeanei ki te rua mano e wha rau e whitu tekau ma whitu tangata kua mate i a ratou e riro ana i te kowheori.
Ki nga keehi hapori, tekau mano, e rima rau e waru tekau ma iwa te kaute i tenei wa. kotahi rau e waru tekau ma iwa kei roto i te hohipera, tokowha ratou kei nga wahi whaomoomo.
Hei ta te panui paapaho, tona wha tekau orau o aua keehi he tangata kua whiwhi i te kowheori ano.
I kii tonu te panui paapaho, he pai te kite kei te heke nga tatauranga, whai muri i tona piki atu ki te wha tekau ma rua mano keehi i mua i te kirihimete.
Ma tetahi kaupapa hari, ma tetahi kaupapa koa e whakakotahi ano ai tetahi hapori ki te tauihu o te waka a Maui.
Koia te korero a te pouwhakahaere o Ngati Tama ki te Tauihu a Hemi Sundgren.
Hei tana na te nui hoki o nga taemahatanga kua kite i nga tau e toru kua taha ake nei, ka whakahaerehia tetahi kaupapa e whakakoakoa ai te iwi ko Tu Ngatahi te ingoa.
Hei tana ano, kaore i tua atu i te kai tahi, mo te whakakoakoa i te tangata.
Hei 25 o Pepuere tu ai te kaupapa nei ki Rutherford Park i Whakatu.
Kua whakapiki te whakatupato ua i te taitokerau ki te whero mo te wa tuatahi no te putanga o nga whakatupatotanga.
E mea ana te whakatupato, no te wha karaka i te ata nei, ki te wha karaka i te ata apopo, ka kite i te ua aawhaa, te rautupu kairakau, me te hau tuupararaa.
Hei ta te mangai o te roopu whakamarumaru o te Taitokerau, hei ta Graeme MacDonald, i tenei wa, kei te aata matakinahia e ratou nga tohu huarere i tenei wa, a, kei te mahi tahi hoki ratou ki te ratonga tirorangi, me te kaunihera a rohe o te Taitokerau.
Hei ta MacDonald, ko te mea nui i tenei wa, kia kaha tatou te whakarite i a tatou ano, mo nga momo ahuatanga rereke kei pa atu ki a koe, ki to wahi noho. Hei tana ano, kia kaha hoki te whakarongo ki nga taipitopito korero hou, i mua i tau puta i tau whare.
Hei ta MacDonald, mehemea ka taea e ko te mahi i te kainga, kia kaua e puta atu.
Kua whakahonorehia te matanga kaihauporo o te motu a Ryan Fox e ona pia, ma te pooti i a ia hei kaiwhiwhi i te tohu a Seve Ballestoros mo te kaitakaro te tau 2022.
Na Fox nga tonamana i Kotimana me te UAE i toa ai, a, nana hoki te tohu nei i toa ki runga i a Rory Mcilroy, me te korero, neke atu i te rima tekau orau nga pooti i whiwhi i a Fox.
Hei ta Fox, ehara i te mea i moemoeatia tenei tohu e ia, heoi, ka tumeke ia i te kite i nga ingoa kei runga. Ko Michael Campbell tetahi o era, nana te tohu i toa i te tau rua mano ma rima.
Kua heke te kapa Rakau Pango Tane ki te turanga tuangahuru o te ao, i ta ratou hinga i a Belgium i nga whiringa whaiti mo te kapu o te ao e rua ki te kore.
Ko Korea te tiima waimarie, kei te turanga tuaiwa ratou ahakoa i oti i a ratou te whakataetae kapu o te ao i mua ke i nga rakau pango.
Na Tiamana te kapu i hiki, a, koia ko ta ratou taitara tuatoru. Na Belguim ke te keemu i arahi e rua ki te kore, heoi, i hoki atu a Tiamana i te haurua tuarua ki te kapo i te wikitoria.
Kei te turanga tuaiwa o te ao tonu nga wahine e noho ana, whai muri i ta ratou hinga i a Peina i te Ratapu.
RELATED NEWS
