Listen Now: 
Download Audio—
Kei nga korero i tenei haora;
– Kua whakaingoahia etahi tokorua hei whakahaere i nga Neehi o te Hohipera Tamariki a Starship,
– Ko nga tamariki te take, koia te korero a tetahi kaiako i mua i te timatanga o te tau kura a tera wiki.
Ko enei kaupapa, me nga kaupapa hakinakina e whai ake nei.
Kua whakaingoahia etahi tokorua hei whakahaere i nga Neehi o te Hohipera Tamariki a Starship, a, ko ta raua mahi he hapahapai i nga tukinotanga ka kitea ki roto i nga ratonga hauora Maori, ma te whakamana i te Tiriti o Waitangi ki roto i nga mahi neehi.
I pohiritia a Hera Watkinson raua ko Romana Raby ki a raua turanga mahi hou i tera wiki, a, neke atu i te rima tekau orau o nga kaimahi o Starship he neehi.
Hei ta te panui paapaho a te hohipera tamariki, koianei te tauira tuatahi i te ao neehi kia kite i tetahi ahuatanga a-Tiriti, hei tiaki i nga tamariki me nga whanau katoa.
Hei ta te Tumu Whakarae o Starship, hei ta Toni Shepherd, e tika ana kia ata whai i nga punaha hauora e aro pu ana ki te painga o te tamaiti me te whanau.
Ko nga tamariki te take, koia te korero a tetahi kaiako o te kurakaupapa Maori o Ngati Kahungunu ki Heretaunga i mua i te timatanga o te tau kura a tera wiki.
Hei ta Te Rina Hesketh, kei te hikaka ia ki te hoki atu ki te mahi a tera wiki, ka mutu ki te kite i ana akonga me te awhina i a ratou ki te whakatupu i a ratou ake tautangata.
Hei ta Hesketh ano ko te awhina i nga tamariki ki te ako ko wai ratou te tino whainga.
Ma tetahi kaupapa hari, ma tetahi kaupapa koa e whakakotahi ano ai tetahi hapori ki te tauihu o te waka a Maui.
Koia te korero a te pouwhakahaere o Ngati Tama ki te Tauihu a Hemi Sundgren.
Hei tana na te nui hoki o nga taemahatanga kua kite i nga tau e toru kua taha ake nei, ka whakahaerehia tetahi kaupapa e whakakoakoa ai te iwi ko Tu Ngatahi te ingoa.
Hei tana ano, kaore i tua atu i te kai tahi, mo te whakakoakoa i te tangata.
Hei 25 o Pepuere tu ai te kaupapa nei ki Rutherford Park i Whakatu.
I tera tau i te takaro whutupooro ia i te tai tokerau, a, i tenei tau kei kite pea i a ia e mau ana i tetahi poraka tamatoa.
Pera i tona matua, tetahi o nga opango o mua a Sid Going, i tupu a Kalani i te whira whutupooro ki te karapu o Mid Northern, i Te Taitokerau, heoi i tenei tau kua whai wahi atu ia ki te kapa tuarua a nga Tamatoa, a, i tenei wiki i whakapikia ia e te karapu ki te whakangungu tahi ki te kapa matua, hei whakarite mo te keemu whakamahana ki nga Taika a te rua wiki.
Hei ta te ripoata kei te Puna, tokotoru ratou kua whai wahi atu ki te kapa, ko Going, ratou ko Solomon, Vasuvulagi, ko Eiden Ackland.
I tenei wa e wha tonu nga turanga kirimana e tuwhera ana ki te kapa Tamatoa.
I toa te tiima pai ake. Hoinano te whakautu a te kaiwhakahaere matua a nga Rau Hiriwa, whai muri i ta ratou hinga i a Ahitereiria e 56 ki te 50 i te whainara o te tonamana Quad Series inanahi.
Hei ta Kahurangi Noeline Taurua, inarawa te pai o te haurua tuatahi, i pai hoki ta ratou whakaarahi i te keemu, heoi i moe i te haurua mutunga.
Hei ta Taurua ano, he nui nga akoranga kua puta i taua keemu, ka mutu me aata arotakehia te ahua e hoki ai ratou ki te papa takaro i muri i te wehenga rua.
Hei ta te kuru uhanga o te kapa hei ta Grace Nweke, i huri te tai i ki a Ahitereiria i te haurua tuarua, a te taea e ratou te pehea.
Koia te tukinga mutunga mo te kapa i mua i te whakataetae kapu o te ao, a te Hurae.
RELATED NEWS
