January 26, 2023
He rā hei whakahihiko i te wairua ki Whakatū
Ā tērā marama tū ai tētehi hui ahurei ki Whakatū hei whakahihiko i te wairua o ngā whānau e noho nei ki Te Tauihu o Te Waka a Māui.
Ko Tū Ngātahi te ingoa o te hui ahurei nei, ā, ā te rua tekau mā rima o Pepuere tū ai ki te Pāka o Rutherford atu i te rua karaka i te ahiahi tae noa ki te ono karaka.
Hei tā Hēmi Sundgren, pou whakahaere o te tarati o Ngāti Tama ki te Tau Ihu, e mahitahi ana ngā iwi e waru o te takiwā, Whānau Ora me ngā kamupene Māori o te rohe ki te whakarite i te kaupapa. Hei tāna anō, he koha tēnei ki te hapori, whai muri i ngā uaua o ngā tau e toru kua hori nei.