Listen Now: 
Download Audio14/11/2022
Kei te kitea te hinātore e tohu ana, kāore e roa ka ea te wā ki te kereme WAI2575…
Koirā tā Lady Tureiti Moxon, tētahi o ngā kaikereme o tēnei pakirehua hauora. Nō te tau 2005 i eke ai ngā kaikereme ki runga i tēnei huarahi, kia āta arotake te rōpū whakamana i te tiriti o waitangi i te huhua o ngā take hauora ka pā ki te iwi Māori.
Hai tā Lady Tureiti Moxon, inā te nui o ngā piki me ngā heke i wheakongia e ia i runga i tēnei huarahi.
————————————————–
Te Whare Wānanga o Te Taumata o Kupe…
Koira te kaupapa i whakarewaina ake i te marae o Te Māhurehure, nō roto mai o Tāmaki Makaurau. Ko te wānanga tōna iho, he ara e titi ai ngā kōrero tuku iho ki te māra o te hinengaro o te hunga e hiahia ana te ako, mō te tipua ko Kupe.
Koirā tā Julian Wilcox, māngai kōrero mō te kaupapa nei.
————————————————-
I whakamānu ake ngā whakaaturanga waka e rua ki Te Papa Tongarewa..
Ko ‘He Kaupapa Waka’ me ‘He Manu Rere Moana’, ngā ingoa o ngā kaupapa nei. I tēnei wā, ka noho ngā waka hai kai mā ngā karu o te tokomaha ka tae atu ki reira, ka mutu, e ai ki te pūrongo a Asly Nathan nō Te Karere,
i whakamānawatia te tohunga tārai waka a Tā Hekenukumai Busby, i te mea, koinei te whakatinanatanga o tōna awhero nui, kia whāngai i te mātauranga mō ngā waka, ki ngā whakareanga e heke mai ana.
————————————————–
I tērā wiki, i tū ai te hui ā tau a Te Mātāwai. Ko te tau 2019 te wā whakamutunga i whakatūria ai tā rātau hui ā tau, nā te ākinga kaha mai o te mate kōwheori i ngā tau tata nei i whakakorea ēnei hui.
Nā, ko te whakarahinga o te pūtea ki ngā kaupapa whakarauora reo tētahi o ngā take matua i hua ake ai i te hui, hai whai mā rātau.
Koirā tā Reikura Kahi, heamana takirua o te poari matua o Te Mātāwai.
Hai tāna anō, ko te āhua nei, e poapoa ana te kāwanatanga i te tokomaha ake o ngā kaihoropū o te reo kia whai kē i ngā mahi kei te kāwanatanga, nā te nui o ā rātau pūtea
————————————————-
HAAKINAKINA
Nāwai i he ka he ke atu…
E rere tonu ana te aroha ki a Ingarangi, i ta ratau hekenga iho ki te korokoro o te parata,
i te ao hakinakina… I hinga ratau i te tukinga whiringa whaiti ki te kapa Toa Hamoa, 27 ki te 26 te tatau whakamutunga.
Ko Hamoa te moutere tuatahi note moananui-a-kiwa kia eke ki te taumata o whiringa toa i roto i tenei whakataetae rīki ipu o te ao…me te aha, me uaua ka kitea tetahi kapa i waho ra i ngā kapa o te kaupae tuatahi penei i a tatau o Aotearoa, Ingarangi me Ahitereiria, e piki ai ki tenei taumata. I miharo katoa te ao ki te pai o ta ratau takaro, ka mutu, i kitea te hiakai me to ratau maia kia whawhai mo te hemo tonu atu. Na, hai te wiki e tu nei ka tutaki ratau kia Ahitereiria ki te mura o te ahi, ki te tukinga whiringa toa.
RELATED NEWS
