Ngā karere o te wā

Ngā take Mate Karauna

Hei te rā nei, ka hui te rūnanga minita o te Kāwanatanga ki te āta whiriwhiri mēnā rā ka noho tonu a Tāmaki ki te taumata ōhiti tuatoru, te motu ki te taumata ōhiti tuarua, ka pēhea rānei. Hei tā te peremia, a Jacinda Ardern, ko te mea waimarie kē, nā te kakama o tātou ki te hoki anō ki ngā taumata ōhiti nei, i taea ai e te Kāwanatanga te hao i ngā tūroro katoa o te kāhui o te Tonga o Tāmaki ki te kupenga kotahi, nā reira, kei te wāhi rāhui kotahi rātou e noho taratahi ana i tēnei wa, kia kore ai e rere atu te mate nei ia rātou ki te hapori whānui o Tāmaki. Hei tā Ardern, ka tirohia ngā tūtohinga e waru i roto i tā rātou hui i te rā nei, pēnei i te pānga o ngā taumata ōhiti ki te ōhanga me te pānga o ngā taumata ōhiti ki ngā hapori me ngā whānau whakaraerae. Hei tā Ardern, ka tirohia hoki te maha o ngā take mate karauna hōu o te wā me te maha o ngā whakamātautau kei te whakahaerehia.

Hākinakina

I toa a Alexander Povetkin ki a Dillian Whyte i te ata inanahi, i tā rāua whawhai mekemeke, ā, koinei te wa tuarua anake kua hinga a Whyte i roto i āna whawhai ngaiō katoa. Ko Whyte te nama tahi i te rārangi ingoa o te WBC, ā, i te whakarite ia ki te whawhai ki a Anthony Joshua, ki a Tyson Fury rānei mo tētahi o ngā tātua o te ao, engari, ināianei, wai ka hua, wai ka mōhio. I mua kē a Whyte i ngā tauwhāinga e whā tuatahi o te whawhai ki te uri o Rūhia, e 40 ngā tau, kātahi a Povetkin ka huripoki i te wairua o te whawhai i te tauwhāinga tuarima, ka whakaweto i nga rama o Whyte ki tētahi kuru poutū taikaha. E rua ngā wā i kihi ai a Povetkin i te papa i ngā tauwhāinga e whā tuatahi, engari, hei tāna, ehara i te mea, i te rongo ia i te mamae kino, nā kona, i kaha nei ia ki te whawhai tonu, toa rawa.

Kua timata te NRL me te kapa Tamatoa ki te āta whiriwhiri rautaki, mō te tūpono, ka pā kino tonu mai te mate karauna ā tērā tau, ā, ka mate nei anō te kapa Tamatoa ki te noho ki Ahitereiria mō te roanga o te tau. E rangirua ana ngā kōrero mō te whakatū miru kotahi ki waenganui i a Aotearoa me Ahitereiria, nā kona kua timata nei te NRL me ngā Tamatoa ki te wānanga me aha. Ki te kore te kapa Tamatoa e āhei ki te noho ki Aotearoa ā tērā tau, ka noho pea rātou ki Redcliffe, 30km ki te raki o Piripane.

Koia te whawhai kua roa nei e tāria ana, ā, hei te wā ka tūtaki atu a Israel Adesanya ki a Paulo Costa ki UFC 253 a te 27 o Mahuru, he hitoria hōu ka hua ake. Koia tēnei ko te wā tuatahi, ka whawhai ngā kaiwhawhai e rua kāore anō kia hinga, mō te tātua UFC middleweight, arā, ko te kōrero mō Adesanya, 19-0 ngā whawhai kāore anō kia hinga, ko te kōrero mō Costa, 13-0 ngā whawhai tē patua. Kua roa hoki te tokorua nei e takahi ana i te ara tiatia e whawhai ai rāua ki a rāua, arā, no te tau 2018 ka takoto i a Adesanya te mānuka ki a Costa, ā, ahakoa kāore i tutuki i taua tau, koinei te wā tika e tū ai te whawhai nei.`

Follow us on &

Copyright © 2020, UMA Broadcasting Ltd: www.waateanews.com

RELATED NEWS

Media Release: Lizzie Marvelly appointed as Director, Rotorua Museum Te Whare Taonga o Te Arawa Iwi chairs feel Labour snub AFFCO targets Rangiuru unionists