Nei raa te mihi, te tangi a Te Taura Whiri i te Reo Maaori ki a Taakuta Huirangi Waikerepuru

Tākuta Huirangi Waikerepuru

Nei rā te mihi, te tangi a Te Taura Whiri i te Reo Māori ki a Tākuta Huirangi Waikerepuru.

Haere rā e hika, koutou ko ō matua

Unuhia i te rito o te harakeke

Ka tū i te aroākapa

Aku nui, aku rahi e

Aku whakatamarahi ki te rangi e

Waiho te iwi, māna e mae noa

“E mōteateahia ana, e tangihia ana a Huirangi Waikerepuru e Te Taura Whiri i te Reo Māori i te rā nei. Nōna te reo o matakite ka ngū, te kairākau o te wawata ka hinga, te tāngāhoe o te waka, ka riro i te wai o aituā, auē taukuri e! Huirangi e, nāu i kawe te riri ki te aroaro o te Karauna kia ora ai te reo Māori hei reo ora tonu i te ao nei. I tohea e koe te tohe i te wā o te korekore, ko te manawanui, ko te manawaroa hei ope whakapūmau i te reo, nā whai anō ka whakairihia ki te rangi horapa i te whenua, ka whakaatahia ki ngā mata kāinga puta noa i te motu. Ka mahue iho ko mātou ki muri nei tangi atu ai, kei te rangatira, kei te pāhake, kei te hoa, haere atu rā,” hei tā Ngahiwi Apanui, Tumuaki o Te Taura Whiri i te Reo Māori

“Ko Huirangi te tohu o te whakaiti, o te whakaaronui ki te iwi, o te mārohirohi ki te manaaki kaupapa. Ka mutu ka kōrerotia ōna rongopai ki runga i te maraeroa o Paerangi, te aronga ōna i a ia e toitū ana i te papa o taurima.”

“Ko tōku taonga, ko tōku reo. Ko tōku reo, ko tōku taonga. Waiho mā Huirangi anō ēnei kupu a tōna tipuna. Mai i te tihi o te maunga tītōhea ki te pikitanga ki te Whare Paremata, ko Huirangi ia ko te reo Māori, ko ia anō hoki ko te taonga ka whakairihia ki te tāhū o mahara.”

Follow us on &

Copyright © 2020, UMA Broadcasting Ltd: www.waateanews.com

RELATED NEWS

Des Ratima consummate advocate and front man Peters not swayed by plane speaking New chair for Te Pumautanga o Te Arawa