Listen Now: 
May 30, 2019
PĀNUI PĀPĀHO: E $6 miriona te pūtea kua riro mai hei tautoko i ngā whānau, i ngā hapū me ngā hapori
Waatea Team
Posted On May 30, 2019
PĀNUI PĀPĀHO
30 o Haratua
Tahua Pūtea 2019
E $6 miriona te pūtea kua riro mai hei tautoko i ngā whānau, i ngā hapū me ngā hapori
E harikoa ana ngā Hoa-Toihau o Te Mātāwai, a Mereana Selby rāua ko Waihoroi Shortland i te pūtea kua riro mai i te Tahua Pūtea 2019 hei tautoko i ngā mahi a Te Mātāwai ki te ārahi i te whakarauoratanga o te reo a ngā whānau, ngā hapū me ngā hapori.
Hei tā Waihoroi Shortland, “Ko tā tātou e mahi nei i ō tātou kāinga me ngā hapori ki te whakapakari ake i ngā pūkenga reo Māori ka hāpai ake i ngā mahi atawhai taha ahurea, taha pāpori ka kawea mai e te reo ki ngā whānau me ngā hapori Māori puta noa".
I roto i ngā tau e rua ka taha ake nei kua whakatūria e Te Mātāwai tana hōtaka haumitanga hei tautoko i ngā mahi whakarauora i te reo Māori e ākina ana e ngā hapori, kua tīmatahia hoki tētahi hōtaka rangahau, hōtaka aromatawai hei ārahi i ngā mahi nei. Ka kitea ētahi tauira o ēnei kaupapa tōmua i konei.
https://www.tematawai.maori.nz/communications/our-stories
Mā roto i Te Whare o Te Reo Mauriora kua tupu mai tētahi kōtuinga i raro i Te Ture Mō Te Reo Māori 2016, me te aha, he kawenga tahi tā Te Mātāwai me te Karauna ki te whai kia ahu whakamua tonu te whakarauorahia o te reo Māori.
Ko te wāhi ki Te Mātāwai ko te ārahi i te whakatinanatanga o te Maihi Māori, te rautaki reo Māori i whanaketia e ngā iwi me ngā hapori Māori mā ngā iwi me ngā hapori Māori.
Hei tā Waihoroi Shortland “E hira ana tā mātou hononga ki te Karauna e mōhiotia ai ngā kawenga motuhake a tēnā me tēnā me ngā kawenga ngātahi a ngāi Māori me te Karauna ki te whakarauora i tō tātou reo."
Ka pakari ake te tauira kāhui a Te Mātāwai i te $6m ka whakapaua i ngā tau e 4 e tū mai nei, ka kawekawe hoki i te haumi a te Karauna i te reo Māori.
E ai ki a Shortland “Kua pai te mahi tahi a Te Mātāwai ki ngā whānau me ngā hapori kia ora tonu ai te reo Māori, kia ngaruru tonu, kia ūkaipō anō te reo".
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2019, UMA Broadcasting Ltd: www.waateanews.com
RELATED NEWS
