Karanga hui a Ngāti Paoa mō tēnei Rāhoroi

Karanga hui a Ngāti Paoa mō tēnei Rāhoroi

Hei tā tētahi o ngā māngai mō Ngāti Paoa a Haydn Solomon, kaore e tika ana kia noho tonu mai te tangata i tohua e te Karauna hei kaitiaki i tā rātou tono raupatu, ki tōna tūranga. Kua karanga hui te tarahiti o Ngāti Paoa mō tēnei rā horoi, a, ko tētahi o ngā kaupapa nui, me pana i a Rick Barker, te tangata i tohua e te Karauna ki te iwi.

Tohutoo ki runga i etahi ingoa waahi Maori

Kei te hiahia te roopu Ngā Pou Taunaha ki te uta i ngā tohutō ki runga i ētahi ingoa waahi Māori. Kei te hiahia rātou kia tapae whakaaro tātou ki a rātou, e pā ana ki te ū i te ingoa Manawatū me te o i te ingoa Ōtorohanga. Kei te hiahia hoki rātou kia whai a Bennydale i tōna ingoa Māori, arā, i a Te Mania Iti. Kei waenganui a Te Mania Iti i a Te Kuiti me Otorohanga.

Me whakatika a Ngāti Paoa i tōna whare

Hei tā te māngai torangapū mō Aotearoa Tuatahi a Shane Jones, me whakatika a Ngāti Paoa i tōna whare. Kua tōtara waahi rua tēnei iwi o Tāmaki me Hauraki, arā, ko te Tarahiti o Ngāti Paoa ki tētahi taha, ko te Poari o Ngāti Paoa ki tētahi. Kua whakatakoto amuamu ōkawa te Tarahiti e pā ana ki a Rick Barker, kaitorangapū o mua o Reipa, i tohua e te Karauna hei āwhina i a Ngāti Paoa ki te whakatutuki i tā rātou tono raupatu. Hei tā Jones, kei te pukuriri ia, kei te tātāhia a Barker e Ngāti Paoa, a, kua kii atu ia ki te Minita i ngā take Tiriti, ki a Andrew Little, waiho a Ngāti Paoa kia oti rā anō i a rātou tō rātou whare te whakatika.

Papakainga hou Hurunui-o-Rangi

Kua whakapuarehia he papakainga hou i te marae o Hurunui-o-Rangi i Te Wairarapa. E ono ngā whare o tēnei papa kainga, a, nā te pūtea a te pūnaha whare o Te Puni Kōkiri me te pūtea tārewa Kainga Whenua a Kiwibank i taea ai e te Tarahiti o Hurunui-o-Rangi ēnei whare te whakatū. Hei tā Henare Manaena, māngai mō te kaupapa nei, kei te pirangi hoki rātou ki te whakahou i te marae.

Kino rawa atu te mate whakamomori

Hei tā te Roopu Mana Māori o te motu, he kino rawa atu te horapa o te mate whakamomori i tēnei whenua, a, kua tae ki te wā e mahi nui ai tātou ki te whakatika i tēnei raru nui. Hei tā te toihau o te roopu, a Matthew Tukaki, kaore he tatauranga teitei ake, puta noa i te ao, i tērā mō ngā tāne Māori ka mate i te mate whakamomori. Kua whakarewahia e te roopu he hōtaka-a-ipurangi e pā ana ki te mate whakamomori ko How to have a Kōrero te ingoa.

Kaore i angitū te tono a Jamie Tuuta

Koia te ūpoko o mua o Te Tumu Paeroa, Koia te Hēmana o te Poari o Whakaata Māori, engari, kaore i angitū te tono a Jamie Tuuta kia noho ia ki te Poari o Fonterra. Ko Leonie Guiney te tangata i tohua ki te Poari. E ai ki ngā kōrero, nā te kaha o ngā kaipupuri hea ki te tautoko i a ia, i kopoua ai ia ki te Poari.

Follow us on &

Copyright © 2018, UMA Broadcasting Ltd: www.waateanews.com

RELATED NEWS

He mahi whakahou i te mārae ō Pūtahi Ko te ngaronga ō nga tūranga mahi Ko te hotaka pouaka whakaata hou ō Marae Kai Marsters