November 04, 2018
Pūtea ki ngā Wātene Māori
Pūtea ki nga Wātene Māori
Hei tā te Minita i ngā take Tuao, a Peeni Henare, e tika ana kia nui ake te pūtea ki ngā Wātene Māori, engari, ko te raru kē, i roto i ngā tau nei, kua pau te nuinga o a rātou pūtea ki roto i ngā mahi whakahaere, kaua ki ngā Wātene tonu. Hei tāna, me whakatikatika i tērā āhuatanga, i mua i tana tono kia whai pūtea hou rātou. E ai ki ngā tatauranga kua rangahaua nei e te Kaunihera Māori o Tāmaki Makaurau, ko te nuinga o te pūtea e haere ana ki ngā Wātene Māori, e haere kē ana ki ngā whakahaere i roto i Te Puni Kōkiri, kaore i te haere ki ngā kaupapa whakangungu, āwhina hoki i ngā Wātene.
Te hui a FOMA
Ko te toitūtanga tētahi o ngā kaupapa nui i āta wānangahia i te hui a FOMA i Tūranga i ngā rangi whakatā nei. Hei tā te toihau o FOMA a Traci Houpapa, ko te auahatanga me te hangarau ētahi atu kaupapa i wānangahia tae atu ki te wai Māori. Hei tāna, katoa katoa ēnei kaupapa nei i āta wānangahia i runga i te whakaaro mātāmua, me pēhea te whakatutuki i ngā wawata pakihi, me te tiaki tonu i te taiao kia toitū tonu ai ngā hua. Hei tāna anō, i riro mā te whakaaro Māori me ngā tikanga Māori ā rātou kōrero e ārahi.
Pukapuka hou a Mike Joy
Kei te hoki ngā māngai o FOMA ki o rātou kainga i tēnei wā, whai muri iho i tā rātou hui i ngā rangi whakatā nei. E akiaki ana a Tākuta Mike Joy, mātanga taiao i a rātou, mēnā rā kei roto rātou i ngā mahi miraka kau, me whai whakaaro pea kia ruarua ake ngā kau o ā rātou kāhui. Katahi anō ka puta i a Joy he pukapuka hou, ko In Mountains to Sea te ingoa. Kei roto i te pukapuka nei, ngā tirohanga Māori nā Paul Tapsell, Tina Ngata me Peter Fraser i tuhi. Hei tā Joy, kei te tino paru o tātou awa i tēnei wā, a, mā te ruarua ake o ngā kau, tērā pea ka mā haere anō.
Copyright © 2018, UMA Broadcasting Ltd: www.waateanews.com